市場再有銀座式商廈推出拆售，尋日恒和珠寶集團（00513）執行董事陳慧琪同劉SIR講，佢哋喺上環嘅恒和中心銀座式商廈有機會喺下月以樓花形式拆售。呢幢商廈係佢哋喺本港首度以集團名義發展嘅物業，呎價料達3.3萬元，全層入場費約5,000萬元，依家核心區同類型物業平均呎價介乎2.8萬至4萬元。

恒和珠寶集團陳慧琪表示，恒和中心銀座式商廈料於一六年第二季落成。

陳慧琪仲話，該幢物業售價會參考港島區同類型銀座式商廈，料呎價約3.3萬元，入場費約5,000萬元，部分舖位就諗住收租。

佢又話，依家集團喺上海有一個建築面積約10萬方米嘅商業廣場，目前已經有70%舖位租出咗，項目主要入係收租用途。佢又話，集團除咗做老本行珠寶業之外，亦會向房地產同礦業發展，希望集團業務更多元化。

紅磡地舖回報逾2厘

對於佔中，當局開始清場，陳氏話，佔領區已經受阻一段時間，清場都係一件好事，希望盡快結束。另外，市場人士表示，其實依家銅鑼灣同中環類似嘅銀座式商廈，平均呎價約2.8萬至4萬元。

仲量聯行香港資本市場區域董事陳柱衡話，恒和中心坐落喺德輔道中238號，地下同1至3樓將作旗艦式商舖，建築面積約9,539方呎，而6至30樓係標準樓層，全層建築面積約1,780方呎，實用率70.3%，全幢物業都係商舖用途，預計喺一六年第二季落成。

另外，紅磡寶其利街雙號地下以約2.750萬元易手，該舖面積約1,200方呎，連約600方呎閣樓，租金回報約2.31厘。

工廈全幢賣 半年12宗

美聯話今年工廈活化的市場反應唔錯，地政總署本年至今共接獲142宗活化工廈申請，佔101宗獲批，當中佔85宗係全幢改裝，而下半年至今，市場錄到12宗全幢成交，總值約64.41億元。

工廈成交方面，萊斯黃慧文話，觀塘兆發工業大廈地下一籃子地廠，總面積約9,313方呎，以約7,196萬元沽出，而同區達通大廈全幢放售及放租，面積約37,220方呎，意向價4億元，意向租金55萬元。

有市場消息透露，北角柯達大廈二期高層一個單位，面積逾2,400方呎，以呎價約7,000元獲承接。