近五個月創業板股英裘控股（08168）靜靜雞開車，股價升咗一倍有多，本月主要喺高位整固，上周五收報0.365元，跌幅2.6%。公司九月申請轉主板，唔排除已好事近，應該有力再試高位0.415元，守住保力加通道底部0.34元可小注。

英裘從事毛皮貿易、毛皮經紀及水貂養殖業務。今年中績唔錯，營業額增長14.5%至1.7億元，純利增長23.8%至2,570萬元，毛利率維持於24%水平，原因係附屬Loyal Speed的客戶群擴大，同埋內地皮草需求高企。值得一提係，水貂養殖投資只係用咗年半時間就帶來盈利貢獻，有助提供其他毛皮來源，而為咗進一步擴充上游業務，現正考慮收購有約二千隻種貂的丹麥水貂養殖場，以及毗鄰面積6公頃的土地，目前揸住現金逾億元，足以支持相關計劃。

另一方面，英裘亦都趁低喺十一月十七至二十一日期間頻頻回購，而且九月拍賣會的水貂及狐狸毛皮成交價上升，下半年業績有睇頭，或為股價帶來刺激作用。