為咗加快住宅土地供應，港鐵（00066）以實惠地價推出將軍澳日出康城第五期發展項目，每方呎地價低至不足1,900元，返番去近十年前嘅水平。有測量師話，今次入場費平，相信今日項目嘅截標反應會唔錯，估計可以吸引到主要大型發展商同埋中資財團入標，而新地（00016）同會德豐地產早前就透露咗有意入標咁話。

今日截標的將軍澳日出康城第五期發展項目，將提供約1,600個住宅單位，而項目鄰近第三期緻藍天。（資料圖片）

高緯環球張翹楚預料，康城五期門檻不算高，相信競投反應熱烈。

將軍澳日出康城第五期招標資料

今日截標嘅將軍澳日出康城第五期，位置鄰近項目第三期緻藍天，屬於純住宅發展。

該項目地盤面積約莫20.02萬方呎，總樓面就大約110.16萬方呎，提供約1,600個住宅單位。

補價20億 低四期9%

劉Sir早排已經收到風，今次補地價金額約莫20.64億元，每方呎補地價只係1,874元，唔單止較今年四月批出嘅第四期明顯低出約9%，更加係日出康城項目近十年以來呎價最低嘅一次。

劉Sir老友高緯環球張翹楚就覺得，日出康城第五期補地價已經有定案，入場門檻唔係咁高，所以競投反應相信唔會太差，除咗主要嘅大型發展商之外，預期項目可以吸引部分中小型以及中資財團入標競投。

雖然今次康城第五期發展項目嘅補地價金額比較相宜，亦不設前期工程費用。然而，張翹楚話，由於招標條款規定項目嘅分紅比例唔能夠少過10%，分紅比例一啲都唔算少，再加上中標財團須要負責興建公共交通交匯處，仲要承擔埋有關建築成本，呢啲都係財團出價要考慮嘅因素。

張翹楚更指出，項目最終批畀邊一間發展商，相信佢哋提出嘅分紅比例係主要關鍵。

會地擬獨資 長實勢爭

劉Sir知道，部分發展商早前已表態有意入標，好似早排攞到第四期嘅新地，集團副董事總經理雷霆喺第五期招標嗰陣已經講到，項目補地價屬於水平合理，會研究入標。另外，會德豐地產都表示會考慮獨資競投。

至於攞到日出康城項目首三期發展嘅長實（00001），劉Sir覺得都有幾大機會去爭，以擴大其區內版圖。