講起滬港通，唔少人將焦點放在港股通乏人問津，但其實滬股通除咗首天爆額之外，跟住兩日都係冷冷清清，尋日餘額高達103億元人仔，表現比港股通更加令人失望。

神州租車沉靜多時後強勢突破，可留意搭順風車機會。（資料圖片）

內地股民就話開戶買港股手續繁複，而且要付高差價進行匯兌，但外資對A股的熱情似乎與市場預期落差更大。如果內地真係咁好錢景，班外資唔會反應咁冷淡，事件可能說明，現時大部分投資者都有需要檢討對內地經濟及投資環境的看法，以免錯判形勢。

港交所彈力有限

尋日市況又係乏善足陳，恒指繼續調整，失守23,400點水平。港交所（00388）股價繼續受壓，失守170元關，曾低見167.5元。翻查資料，本月上旬港交所沽空無大異樣，可見班大戶觀望滬港通表現，唔敢輕舉妄動。

不過，見周一滬港通真正啟動後，南、北額度均未有出現大家憧憬的「秒殺」場面，聞到燶味，淡友隨即發動攻勢，本周一、二，港交所沽空股數分別大增至378萬股及259萬股，沽空金額合共逾十億元，尋日沽空股數又有323萬股，單日沽空額5.5億元。呢三個交易日港交所股價已累跌近一成，除非突然有重大利好因素出現挾淡倉，否則唔排除年底前股價彈力都有限。

大價股冇運行，炒家回流二、三線股同其他國策股。尋日留意到一隻異動股，就係利基控股（00240），發行股數得12.4億股，但尋日成交股數竟高達3.11億股，成交金額1.56億元，相等於市值的三成，真係炒到出煙！全日股價一度高見0.61元，收報0.42元，升44%。公司通告話不明股價及成交上升原因，不過睇見炒味咁濃，除非係春江鴨，否則局外人純粹湊熱鬧落場跟炒，同過大海賭大細冇乜分別！

若然唔想炒股仔，可以留意吓半新股。今年七月上市的中國飛機租賃（01848），招股價5.53元，掛牌兩、三個月都係冇咩動靜，但到本月初開始見真章，由月初7元水平踢上尋日創新高12.38元，收報11.56元，跌0.5%。

同樣係做租賃業務，不過係出租汽車的神州租車（00699），九月以招股價8.5元上市，尋日靜極思動，一口氣抽上新高12.46元，收報12.08元，升2.5%。走勢上，尋日才剛剛破位，睇勢應該仲有得去，不妨留意坐順風車的機會。