過去兩星期，港股走勢認真戲劇性，成也滬港通，敗也滬港通。以為開通無望，殊不知確認通車消息，恒指五連跌後，上周彈足五日，周五再升67點報24,087點，全個星期計升537點。

恆指期貨走勢

睇番轉頭，比起前一個星期，五連跌前的起步位23,998點，即使恒指在消息落實後，V形先跌後反彈，可是十個交易日總結，指數不過升89點。奢望○七年直通車，一條氣由萬九炒到上三萬二相比，根本不切實際。

但凡有這類政策出台，到底真係有無形之手托市，抑或是憧憬無形之手的炒家，自己一廂情願，變相幫咗手托市都好，今日滬港通啟動，配合恒指上周五升到接近24,100點及24,133點的三頂阻力，大市借消息破位上衝的機會相對較高，筆者已按計劃在上周五收市前，在24,050點補回十一月期指好倉。

按過去六個交易日，恒指即市低位有上移迹象，相信破24,100點及24,133點應該難度唔大。現貨計，真正關鍵阻力位是九月初高位25,362點至中期調整低位22,565點的0.618反彈阻力24,294點，升穿後，估計至少可以見到24,133至23,430點的1.5，即24,485點附近。