新界西樓價近年發力追落後，元朗同屯門區唔少屋苑紛錄破頂高價成交，升勢亦已蔓延到區內二線屋苑。近排部分樓齡高近三十年嘅舊樓，連環錄得實用呎價破萬元成交，其中元朗好順意大廈A座高層單位，剛以呎價10,865元賣出，兩年大幅升值45%，呎價創屋苑歷史新高之餘，仲比區內指標屋苑YOHO Town平均呎價更高。

新界西樓價近年奮力追落後，升勢已蔓延至區內二線屋苑。（資料圖片）

元朗好順意大廈雖然樓齡較高，但售價相宜，獲上車客及投資者追捧。（資料圖片）

新界西高價成交個案

劉Sir聽代理老友講，元朗同屯門區唔少指標屋苑嘅成交，都已進身實用呎價「萬元戶」行列。

老友話，其中元朗區兩大指標屋苑YOHO Town同YOHO MIDTOWN，最新平均實用呎價分別大約1.05萬及1.085萬元，前者近排仲連環錄得呎價突破1.1萬元嘅新高價成交，其中3座高層B室，成交價458萬元，實用呎價11,654元，破晒屋苑紀錄，原業主喺一○年一月以209萬元買入單位，獲利相當和味。

接連破頂 兩年升5成

除咗大型指標屋苑之外，元朗區二手屋苑嘅樓價升勢同樣凌厲，其中樓齡已經二十七年嘅好順意大廈，A座高層5室啱啱以289萬元易手，實用呎價10,865元，創屋苑歷來新高，原業主喺一二年九月以200萬元買入單位，短短約兩年大幅升值成45%。

另外，同屋苑B座高層6室，早前亦以273萬元易手，實用呎價9,636元，原業主只係持貨兩年幾，物業又大幅升值56%。

好順泰264萬獲承接

至於同區樓齡同樣高達二十六年嘅好順泰大廈，啱啱都錄得實用呎價破萬元高價成交，單位係A座高層B室，成交價264萬元，實用呎價10,185元，又係創出屋苑歷來新高。

中原提供資料顯示，新界西樓價指數升幅無論係今年定過去兩年，通通跑贏大市及其他地區，截至十一月初，新界西樓價指數最新報114.93點，比舊年底升15%，期內中原城市領先指數升幅僅8.7%，如果同一二年底比較，新界西樓價指數兩年間升19.6%，比起期內中原城市領先指數升幅僅11.8%，升逾66%。