SUN MONEY：全城備戰滬港通

證券行揼本：投資數百萬更新交易系統

中信証券國際董事潘小茵表示，公司為籌備滬港通涉及的投資額，遠高於港交所（00388）公布的200萬平均數，包括更新及設置交易系統；而過去一周，相關員工均於各銷售據點與客戶進行最後的小組或單獨會面，重溫滬港通的重點和關鍵訊息。

信証清晨standby

她指，「我哋已安排同事喺今早清晨甚至半夜standby（隨時候命），亦都會喺開市前再進行內部測試。」她不擔心當日額度會很快用完，亦不認為滬港通會令股市短期動盪，反而提醒投資者要謹記兩地不同的「遊戲規則」，以免交易時造成混亂。

潘小茵稱，公司今日起會推出0.1%的特惠佣金，亦會以每周競賽、佣金回贈母公司A股形式吸客。

她續指，現時母公司中信証券（06030）研究團隊覆蓋的A股數目逾千隻，遠多於滬股通下的股份數目；由於公司將與母公司「資源共享」，相信這會是吸客的有利條件。

中信証券國際 潘小茵

散戶Richard：諗埋深港通概念股

今年投資回報逾四成的股壇老手胡李察（Richard）稱，滬港通通車宣布得「好突然」，「連港交所之前講好嘅兩周通知期都無」。幸好，通車消息未有打亂他的投資部署。

浙江世寶看高一線

他稱，「我已經無揸任何滬港通相關股份，連港交所都沽晒，反而覺得浙江世寶（01057）可以『吼』，因為股份早前創新高，加上佢A股喺深圳買賣，可以憧憬深港通概念。滬股概念就唔好再諗喇，通車日期都公布埋，炒完喇！」接下來，他會觀察滬港通能否成功帶動港交所成交量增加，才考慮是否再次吸納股份。

胡李察 （Richard）

經紀早返工：金睛火眼（目及）實大盤

時富金融（00510）投資服務部行政總裁鄭蓓麗稱，公司早已為滬港通通車做好準備，今日將正式投入作戰狀態。她透露，相關部門同事今早需提前半小時上班「備戰」，為公司交易系統進行最後檢測，確保操作流程順暢。

她表示，「無必要都唔會安排喺今朝開會，到時開市就要停晒手上工作，金睛火眼『芒實』（緊盯）大市，睇吓有咩大盤出現，睇吓啲客有無足夠人民幣去做交收。」

雖然滬港通通車消息來得突然，但她笑言，「好彩啲『阿頭』都喺齊度，之前去咗旅行嘅人都返晒嚟。嚟緊唔畀再放假？咁當然啦！通車初期係會緊張啲，大家都需要時間適應，無咩必要就唔好請假啦！」

與內地券商交換資料

為協助客戶收集A股情報，鄭蓓麗指，公司會與內地友好券商互換中港股市研究報告，但由於內地分析報告板塊多、內容詳盡，難免令人「吃不消」。「啲客對A股唔熟，所以初期都係由我哋主動將推薦個股嘅報告發去佢哋私人電郵，遲啲先實行『網上自取』嘅方法。」

時富金融 鄭蓓麗

缸邊Briefing：股友揀定冷門心水

致富證券大圍分行經理石泳傑指，有股友已做定功課，發掘可受惠滬港通的細價冷門港股，如鳳凰衛視（02008）。雖然大部分客戶均稱無意在短期內買A股，但亦有個別股友已兌換人民幣，準備充足。

留意成交活躍滬股

他又指，今早開市前會先與股友「做個Briefing（簡報）」，開市後則會特別留意是否有大成交的滬股出現，若有一手消息，「會即刻開咪話畀大家聽」。他強調，今日會以平常心迎戰滬港通，同時會確保自己裝備足夠，清楚市場狀況。

致富證券 石泳傑

大學生備資：專注港股 謀定後動

浸大投資基金管委會主席鄭晴（Mary）認為，滬股通是涉足A股市場的好機會，各委員均冀可透過滬港通為投資基金買入A股，「不過要先得到教授同意，啲錢始終係校友嘅捐款，所以暫時先繼續專注投資港股，可能遲啲再商量吓會唔會調整策略啦」。

買入中行冀穩勝

由於滬港通始終是股壇大事，她指各委員對事件甚為關注，開會時總會掛在嘴邊。

她更表示，早於半年前已經買入四大國有銀行之一的中國銀行（03988），期望穩陣取勝，上周該股受惠於撤銷人民幣兌換限制而上漲，故至今未計息率回報已經有約25%，「我都好滿意！」

浸大投資基金管委會主席 鄭晴（Mary）

內地生好興奮：在港開戶避免風險

已買A股數年的浸大內地生李雨珊（Yosa）指，基於只有合資格的散戶才可參與港股通，故打算直接在港開戶，「嚟緊都想投資番多啲港股，始終香港股市比較穩陣，風險低啲，自己亦較多時間留喺香港。」

本以為無限期擱置

身兼浸大投資學會主席的她又指，該學會早於一個月前已着手籌備將於今日舉行的滬港通專題活動，「我哋本來仲擔心滬港通會無限期擱置，活動可能要轉其他題目，好彩上星期宣布今日通車，而個seminar咁啱就喺今日舉行，所以好興奮，即刻同合作機構聯絡，希望佢哋到時可以講多啲實用性嘅資料。」

浸大投資學會主席 李雨珊（Yosa）