Fundman睇市：置富產業諗得過

為配合滬港通開車，金管局宣布將港人每日限換20,000元人民幣的限制取消，而貪新鮮的筆者，亦已經決定下星期坐坐滬港通號，體驗一吓交易流程。

雖然相信在下同大部分散戶一樣，都會覺得搵A股做主戰場恐怕難啲，始終隔山買牛，再者A股監管及資訊披露都同香港仲有距離，估計初期最有興趣經滬港通追A股的，仲係一班QFII基金，可以藉此回撥部分QFII配額出嚟，等將來A股ETF需求增加（估計滬港通開車後，大摩MSCI唔使幾耐會加入更多A股元素，吸引更多指數基金進場），可以做多啲生意。

阿里巴巴主帥馬雲確係厲害，○九年藉「雙11」光棍節網購優惠，今日經已成為單日交易數以百億計的全球網購活動，今年交易金額高達571億元人民幣，比去年的350億人民幣大升63%，亦勁過晒電子商貿發迹地美國感恩、聖誕兩節網購的總和。

騰訊隨時破高位

不過，早被偷步炒起、連升六日的阿里，在好消息出貨下，前晚在紐交所跌3.8%，收114.54美元；另一中國電貿商京東（JD）也跌1.6%收場，報25.81美元。反而近排紋風未動的騰訊，尋日炒落後升1.2%，收129.2港元，市值1,532億美元，大約係阿里2,847億美元的五成四，當科網股玩家焦點轉移番去騰訊，估計破134元高位指日可待。

兩隻心水REITs先後腳派成績表，置富（00778）首三季收益12.3億元，按年升33%，可分派收益5.84億元，按年升26.8%，單第3季度可分派收益1.93億元。首三季基金單位分派31.18仙，相信達到大行預測全年派41.6仙的目標應該問題唔大，現價預期分派息率5.66厘（明年5.93厘），相對近日十年美債息回到2.34厘水平，息差維持超過3厘，對於需要長期固定收入的投資者來說，現價仲係有相當吸引力。

領匯短期已到價

至於剛被選入藍籌的領匯（00823），半年收益升9.6%至38.3億元，物業收入淨額升10.6%至27.83億元，中期每基金單位分派為89.56港仙。在收購現崇山商場的財務影響下，保守估計全年每單位分派1.8元，現價等於3.83厘，稍低於○七年以來平均的4.37厘。

以前真係有啲怕被揀入恒指的股票，話就話指數基金衝一浸，短期可以推一推個價，不過隨即走樣的紀錄真係唔少，遠的有數碼通（00315）、思捷（00330），近三年的昆能（00135）及蒙牛（02319），都係被欽點之後就走晒樣。無他嘅，恒指服務公司揀卒條件係市值、行業代表性及財政狀況，講到底係要有足夠認受性，咁好自然會搵到一些行業周期行到高峰或者過咗高峰的公司入去，好彩今次揀收租佬領匯，勝在行業周期並唔明顯，唔會大上大落。

近排歐、日狂印銀紙加大量寬，中和美國退市息口預期向上對REITs的不良影響，不過領匯貼近47元，短期似乎到咗價，有貨在手唔怕揸住，未入市就不如等去番45元樓下至諗。