果然春江水暖鴨先知，上星期五港交所（00388）同埋一堆中港券商股，失驚無神炒到出煙，儘管收市升幅收窄唔少，但隱隱然已聞到滬港通開車味道。

恒指期指走勢

昨日監管當局確認下星期一就通車，偷食的好友趁好消息見光，紛紛反手食胡，形成高開低收格局，追消息的散字派變晒大戶點心。

挾淡倉買盤支持下，昨日恒指以24,074點開出，隨即見高位24,110點，之後大部分時間在23,935至24,000點窄幅上落，三點後升幅收窄，僅升194點，收23,744點，高位落番365點之多，又再見到今年港股習慣行三步退兩步的疲態。

至於十一月期指同現貨市場一樣，都擺出一副春江鴨食胡格局，早市開24,100點，隨即抽上24,199點，悶了大半日之後，埋單收23,741點。

一直等滬港通或人行放水，昨日終於有機會食胡，但難掩慘勝的感覺，恒指雖上破50日及100日線，但最後大陰觸收未能守住，僅企於10日線上，也未能觸及月初24,133點高位，走勢麻麻。筆者好倉獲利近500點後，暫時手上無倉，會睇多一兩日再算，總結昨日市況，頗令筆者失望。