佔中持續超過一個月，但有投資者就未受影響，繼續入市。尋日資深投資者林子峰同劉Sir講，佔中後已經用咗超過24億元入市掃貨，完全冇驚過大市受佔中拖累，今年連同其他夾份投資項目，已經累積用咗約36億元入市。佢最近就用咗2.55億元買咗油麻地現時點商場地下至二樓，諗住拆售122個舖位。

油麻地現時點商場，將分拆一百二十二個舖位出售。（資料圖片）

資深投資者林子峰表示，佔中後已經斥資超過二十四億元入市掃貨。（資料圖片）

投資者林子峰本年購入的物業

今年積極入市的林子峰話，連埋夾份項目，今年至依家已經用咗差唔多36億元入貨，係近年使得最多錢嘅一年，上年都只係用咗約16、17億元。

佢又話，冇驚過佔中影響市況，覺得唔會長期持續，佔中後就用咗24億元掃貨，其中15億元買咗三個領匯商場，會先翻新商場停車場，之後再翻新商場，另外上個月又用咗6.338億元買咗葵涌威信物流中心，而家幢工廈就公開招標緊，如果冇人出啱價，就會將幢工廈活化，可能地下至二樓就做商舖，樓上就做寫字樓，亦將會係佢哋首次踏足寫字樓市場。

資金湧港 工廈發圍

佢又話，最近以約2.55億元買咗現時點商場，將會分拆122個舖位出售，總實用面積逾2萬方呎，舖位實用面積約80至200方呎，入場費約50萬元，裝修費大約2,000萬元，最快今年底賣，買家可以有兩年5%租金回報。商場裏面有部分舖位喺過去十七年都未有加租，部分舖位建築呎租只係30至40元，回報率有上升空間。佢仲話依家睇緊幾個物業，相信今年內會再入貨。

對於滬港通即將落實，他就估計，到時有大量資金湧港，覺得大樓面面積嘅物業，好似工業大廈等物業會受市場追捧，相信到時嗰價會向上。

城市金庫租三千起

市場有迷你倉拆售，朋信地產話，葵涌華達中心一個超過一千方呎工廈單位將分拆出售約30個迷你倉，建築面積約24至54方呎，售價由約10萬至20萬元。

另一方面，美聯廖文傑同劉Sir講，北角城市金庫共有360個舖位放租，舖位面積約20至184方呎，月租約3,000元起，預料商場會喺下個月期間開幕。