內地股市靠穩，滬綜指企穩在2,400點樓上，收報2,425點，升6點。不過，港股市況依然無甚足觀，恒指高開42點後回軟，全日最低見23,623點，收報23,649點，跌46點。市況淡靜，主板成交僅583億元。

中建材集團入股中國玻璃，相信是看好行業步入上升周期。（資料圖片）

到底APEC北京會議結束後，香港局勢會否有突破，對此缸邊友似乎多選擇駐足觀望，加上十月份經濟數字將反映局勢變化的影響，要有心理準備，短期港股或會繼續跑輸鄰近地區股市表現。

尋日聯想（00992）沽壓沉重，低位見過10.62元，收報10.78元，跌5%，單日市值蒸發逾60億元。公司剛公布截至九月底止第二季度業績，收入及盈利分別增長7%及19%；若計首兩季度，純利增長21%，毛利率上升0.2個百分點至13.4%。整體而言，表現大致符預期，但盈利增長中期息卻維持不變，可能因此惹來部分基金股東沽貨表達不滿。

聯想宜人棄我取

平心而論，近年聯想進行咗兩宗大型併購，盈利增但派息維持不變亦可予理解。再講，公司業務與新併購業務整合須時，在成效彰顯前，股價借盈利增長冇驚喜而調整，反為中長線投資者提供入市機會。以現價計，往績市盈率17倍，息率2厘，股價落到10元邊，相信唔少實力投資者會考慮人棄我取！

重磅股繼續抖氣，升幅榜被消息股佔據。與騰訊（00700）合作播劇的香港電視（01137）股價急升28%。

行業步入上升期

另一隻消息股乃中國玻璃（03300），公司獲中國建材集團入股，刺激股價急升10%，收報1.04元。睇中國玻璃的十年股價走勢圖，見到好明顯的周期韻律，現時正處於周期的底部。中建材集團旗下中國建材（03323）早前擬入股山水水泥（00691），依家集團又入股中國玻璃，似乎正係要把握行業上升周期重臨前的投資機遇。

理論上，若然經濟復甦，製造業景氣好轉，原材料股是最先炒高的板塊之一，只是唔知好景幾時先至再出現，反正唔會係年內，所以估值「平」唔等於要立即買，事關唔知估值仲要「平」幾耐。不過，有國企入股，且不排除會進一步增持，都算係泊到大碼頭，照計應該可以為中國玻璃的估值加分。

現價計，中國玻璃的往績市盈率約15倍，市帳率約0.58倍，息率0.9厘，有閒錢買番些少坐吓等運到無妨。