居屋市場樓價鬥癲，九龍居屋呎價頻頻過萬元，長沙灣怡靖苑高層單位賣到690萬元，成為新九龍居屋王，樓價貴過新盤開價。新居屋開價吸引力有限，買家唔想再等，用長成交期搶盤，上水彩蒲苑連錄兩宗特長成交期買賣個案，自由市場成交價都只係265萬元。

九龍居屋備受買家追捧，呎價頻頻過萬元。（資料圖片）

呎價萬元的九龍居屋

劉Sir有驚人發現，怡靖苑寧靜閣高層3室，上個月賣咗690萬元；如果無記錯，個價已經係九龍居屋王。

呢個屋苑九三年入伙，一向都無乜成交，如果以單位建築/實用面積約830/597方呎計，建築/實用呎價8,313/11,558元，呎價同新盤部分平價單位差唔多。

富誠地產林栢榮都話，牛池灣居屋嘉峰臺4座中層K室，實用面積431方呎，自由市場賣成430萬元，實用呎價直逼1萬元。其實睇番資料，同屋苑5座單位賣過490萬元，實用呎價過1萬元；但市傳有機會係內部轉讓。

家天下黎振傑話，旺角居屋富榮花園12座低層戶，兩房都賣518萬元，實用呎價1.07萬元。

彩蒲獲長成交期搶貨

新居屋開價後，價錢唔多吸引，駿昇置業老友馮宇成話，有買家知道新居屋個價，決定唔等入市，更以長成交期搶盤，方便業主換樓，彩蒲苑連錄兩宗長成交期買賣個案。

其中，有間A座中層單位自由市場價賣265萬元，明年三、四月至交樓，實用呎價約7,840元。

其實，今年細價樓受追捧，中原報告，上月錄55宗公屋買賣登記，全部過100萬元，總值1.13億元，首十個月錄517宗已多過上年全年。

綠楊連租約低17%沽

至於私樓，消息話，荃灣綠楊新邨R座高層兩房單位賣498萬元，實用呎價10,484元創新高；但美聯梁仲維講，同屋苑D座低層1室連租約賣495萬元，實用呎價只係8,505元，低市價17%。

利嘉閣楊震霆就話，烏溪沙站上蓋銀湖．天峰8座高層兩房單位售675萬元，創咗同類山、海景戶嘅新高，實用呎價1.25萬元。

另一方面，中原何鎮宇同劉Sir講，薄扶林置富花園今個月有5宗買賣，屋苑1座高層H室賣到558萬元，實用呎價1.27萬元，係同類嘅新高價。