隔晚美股創新高後輕微回吐，滬綜指先跌後拗腰，微升不到1點。外圍缺乏指引，昨日恒指低開66點後，曾重返兩萬四樓上，見24,016點，惟承接力唔夠，十點半後大市呈陰陰乾，向下尋找即市支持，恒指最後跌70點，收23,845點，大市主板成交增加至708億元。十一月期指日市收23,811點，低水35點，成交4.87萬張。

恒指由十月二十七日低位23,012點，升至前日高位24,133點，合共最多升1,121點。過去三日在外圍股市平穩下，港股傾向以橫行消化上周升幅，指數一連三日即市嘗試挑戰50日線阻力（昨在23,960點），但最終收市都是無功而還。

尚幸是，走勢仍向上的10日線已升抵23,598點，好友如果能夠捱到本周後期，等10日及20日線上移至更接近水平，即市支持漸起作用，後市再破24,133點機會仲係好大。

單見過去幾日券商股及港交所（00388）未受滬港通煞停消息影響，股價級級上，大戶有何部署，幾乎已去到路人皆知的地步。在兩萬四樓上將手頭好倉平倉後，筆者繼續做好兩手準備，一旦大市收市前確認破頂，現貨24,133點，期指24,087點，會即時追買，或者等指數即市觸及10日線，才以三分一注碼開好倉。