大市尋日高開34點後，未能進一步向上，全日窄幅上落，恒指最後以23,745點收市，跌70點，國企指數則在基建股做好帶動下，升67點，以10,727點收市，全日主板成交金額708億元。

長汽推出的新車款獲市場認同，銷售表現遠勝預期。（資料圖片）

大市尋日整體市場氣氛其實並不算太差，主板上升股票有667隻，下跌有602隻，至於創五十二周新高的股票亦45隻，當中的基建股氣勢如虹，中國中鐵（00390）及中交建（01800）分別創5.13元及6.67元一年新高。

機械股提防追寶尾

內地股市昨日持續做好，計埋尋日已經出現六連陽，滬綜指最後升0.65點，以2,430點收市。機械板塊成為市場焦點，中聯重科（01157）及機械工程（01829）分別升15%及11.8%。不過亦有意見認為，連一直落後的機械板塊昨日亦被炒起，意味內地股市此輪升浪接近尾升，投資者需留意。

尋日朝隻中廣核美亞（01811）牛皮上落，直至三點過後先至發力，仲創埋2.76元新高，最後以2.73元收市，升幅5.4%，由於走勢剛現突破，相信要升抵目標3元唔難，可以坐定定等食胡。

至於尋日點題的東航（00670），一如阿莊所料一度跌穿3元關，但係瞬間即逝，阿莊掛咗個牌喺2.98元都買唔到，惟有睇多陣，但係炒航空股一定要留意國際油價走勢，若然油價有掉頭回升迹象，航空股就玩唔過。

汽車股昨日呈個別發展，長城汽車（02333）表現最標青，股價升7.4%，以36.15元收市，華晨（01114）亦升4.15%，以13.54元報收，吉利汽車（00175）及廣汽集團（02238）均升逾1%，但東風集團（00489）就跌1.9%。事實上，汽車股走勢迴異，當然與旗下銷售表現有直接關係，長汽最新公布的十月銷量，就按年錄得11%升幅。

七月期間，長汽推出H2型號時，市場一直擔心定價過高會影響銷售，但其七至十月的銷量卻遠勝預期，反映長汽產品在市場的認受性。旗下的H1及H9亦已開始訂購，若新產品銷售有驚喜，將可支持股價持續向上。

昨日長汽成功突破250日線，技術走勢進一步轉強，加上成交配合，料有機會挑戰四月中旬高位41.5元，可候回落至35元附近買入，止蝕訂在10日線32.88元。