未揀樓嘅白居二所剩無幾，新居屋啱啱開咗價，預計第二市場公、居屋需求陸續減少。睇番房委會資料，上個月公屋及居屋第二市場成交，按月再少逾32%，已連跌五個月。但唔係個個買家都會等新居屋，近排細價樓交投有回升趨勢，屯門大興及碼頭區屋苑，近日睇樓量急增70至80%，約兩日連錄10宗買賣。

上月公屋及居屋第二市場成交，按月再少逾三成。（資料圖片）

元朗公屋朗屏邨錄得低價成交。

公屋及居屋第二市場每月成交量

劉Sir睇番房委會數據，上個月公屋同居屋第二市場錄到109宗成交，比起九月錄約161宗，少咗成32.3%，但成交價位依然高企，鰂魚涌居屋康山花園連錄兩宗實用呎價逾9,200元嘅高價成交。

不過，元朗公屋朗屏邨中層單位，只賣20萬元，實用呎價約573元，呢個成交係業主自行議價出售。

其實，都唔係全部買家都會等新居屋，部分等唔切嘅買家，近排都加快入市細價樓。

中原陳世豪話，屯門大興同碼頭區屋苑，由於二、三百萬元有盤，同新居屋售價差唔多，兩日已經有成10宗買賣，區內睇樓量急升70至80%，居屋兆禧苑B座高層4室，自由市場價賣250萬元，連埋補價實用呎價只係7,396元。

天頌三年帳賺百萬

天水圍居屋自由市場都接連錄到成交，祥益蕭嘉偉話，天頌苑同天愛苑連錄買賣，前者N座低層15室賣267萬元，實用呎價約6,166元，約三年升值過百萬。私樓細價盤交投亦向上。

利嘉閣鮑允中講，九龍灣得寶花園A座高層實用面積264方呎單位賣346萬元，實用呎價逾1.31萬元。

青衣細單位買賣旺

中原代理又話，青衣區兩日都有7宗買賣，青怡花園1座中層兩房戶，租客535萬元買樓升級；馬灣珀麗灣兩日都有5宗買賣，29座高層兩房單位，「無樓睇」都賣464.28萬元，實用呎價9,754元。

世紀21奇豐老友講，馬鞍山迎海一期5座中層A室，實用面積497方呎賣635萬元，實用呎價12,777元創二手新高。

另外，再睇埋利嘉閣嘅報告，50指標屋苑上星期有143宗二手買賣，按周多咗9%，二手交投有回升迹象。