上周五中國遠洋（01919）裂口高開2.6%，喺成交急增下，即市一度突破八月延伸至今的下降軌頂部阻力3個半，收報3.48元，升幅逾3%，原來公司啱啱向母企出售中遠船務3%及上海遠洋賓館48.07%股權，代價2.5億元及3.2億元人仔，交易除有助更專注於核心業務外，資金亦將用作物色船運業務其他投資機會。

睇番成績表，中遠洋首三季收入增長2.9%至474.2億元人仔，虧損縮至6.5億元人仔，去年同期則蝕20.3億元人仔，大躍進原因之一係今年第三季轉賺16.2億元人仔。另外，首三季集裝箱航運業務貨運量按年升8.8%；碼頭業務總吞吐量亦按年升9.6%。

截至九月底止，公司經營集裝箱船舶185艘，運力90.6萬標準箱，持有10艘集裝箱船舶訂單，合共11.7萬標準箱。滙證出報告叫人買，話佢成功靠縮減乾散貨船隊規模去收窄虧損，同時末季料將計入出售資產收益6億元人仔，加上股本回報率已經觸底，今年有望見番中單位數水平，畀佢目標價4蚊。