自今年四月日本調高消費稅後，國民開支及經濟都有降溫迹象，日本財金官員近日也陸續放風，指第二輪調升稅率好可能要押後，首相安倍晉三更直言，消費稅調整如果幫到政府財政收入但拖跨經濟，措施將變得毫無意義。本來市場預計，日本或遲或早要擴大量寬規模，但最快都要等到明年初，殊不知日本央行上周五已經宣布，把每年購債規模擴大到80萬億日圓。

達能入股將有助改善雅士利營運表現。（資料圖片）

太陽日誌

券商預測雅士利業績

消息一出，日股上周五彈升5%，創年半最大單日升幅，日圓則跌至超過六年新低。今次日本唔單止以量寬中和消費稅的影響，壓低匯價振興出口，也抵銷了美國退市令環球游資減少的預期。由上周五美股創新高，道指收市升195點，可見對於寬鬆貨幣政策上癮的投資者，對消息有幾咁歡迎。

港股重拾動力

多得日本放水，為上周五港股再注入動力，指數一度重上兩萬四水平，收市升296點，報23,998點，主板成交增至829億元，是十月三日以來最多。滬港通被煞停後，恒指整周累積升696點，當晚美股再創新高，夜期再升86點，收24,029點，似乎今日港股升勢未係時候停低落嚟。

上周二開始，A股連抽四日，仲要成交額持續唔細，A股炒家點睇滬港通被煞停，已經畫公仔畫到出腸。上周所見，幾隻同擁兩地牌照的券商股，表現相當搶眼，海通證券（06837）收13.3元，較上周一人人以為滬港通已經無希望時的最低位累積反彈11.3%，中信証券（06030）收19.34元，累積彈10.6%，中國銀河（06881）彈7.4%。俗語話buy on rumor sell on fact，睇海通證券及中國銀河走勢都有醞釀破位趨勢，今日如果無乜心水，可以留意番佢哋。

注資機會不高

雅士利國際（01230）早排股價異動，果然係春江水暖，上周五同大股東蒙牛乳業（02319）聯合宣布，法國乳品公司達能向雅士利認購11.86億股，每股作價3.7元，較停牌前溢價一成六。入股之後，達能揸25%雅士利，成為第二大股東，而蒙牛持股則攤薄至51.04%，繼續保持其附屬公司身份。

達能本身是酸奶、乳製品及瓶裝水生產商及品牌經營者，去年五月獲蒙牛入股。達能以溢價入股的消息，搞到雅士利上周五開市炒到上3.44元，埋單倒跌9.1%，收報2.88元，高追來回可以揩五毫幾，反映表錯情股民實在唔少。

達能本身有做嬰兒食品，但揸得25%，估計注入雅士利機會唔係咁大，肯用咁高價入股，當然係睇好雙方戰略合作，未來達能有條件改善雅士利，令後者在內地一眾本地薑奶粉品牌中脫穎而出。

不過，短期而言，交易唔涉及全面收購，而合作又要一段時間至見到成績，估計市場焦點會落番去下半年麻麻的業績身上，若把握唔到入股消息成功走位，斷估短期仲係有機彈上3元樓上，不妨考慮先食一食胡。