二手樓市由佔中初期嘅「無成交」，到依家開始有番啲成交。好似西南九龍同奧運站一帶屋苑，今個月都做咗接近30宗二手買賣；而上車盤樓價更全無壓力，粉嶺牽晴間有單位成交實用呎價首次達1萬元。

奧運站屋苑近十日交投回暖，而近日連錄的數宗買賣更是單單過千萬。（資料圖片）

家天下黎振傑同劉Sir講，奧運站屋苑呢十日交投多番，近日連錄3至4宗買賣，單單過千萬，有個西南九龍帝峯．皇殿1座中層單位，實用面積1,174方呎，都賣成2,395萬元，實用呎價約2.04萬元，原業主約莫四年賺近700萬元。

有消息話，奧運站一號銀海6座高層單位，都賣到2,230萬元。其實區區都有大額買賣。代理爆料，東涌藍天海岸5座高層相連單位，賣成1,570萬元。

康怡三客爭 賣848萬

除咗九龍二手交投反彈，港島都多番。中原楊文傑話，鰂魚涌康怡花園本月頭十幾日都「食蛋」，之後成交多番，全月錄9宗，日前錄到L座高層6室，實用面積605方呎，三枱客爭到848萬元賣咗，實用呎價1.4萬元破同類紀錄。

美聯吳肇基話，同區太古城日日有成交，元宮閣高層C室賣980萬元。

世紀21北山嚴智贇又話，天后維景花園B座中層4室煙花海景單位，賣755萬元，實用呎價1.72萬元，高市價20%。

代理又話，鴨脷洲海怡半島有個7座連租約單位，都賣到950萬元，實用呎價1.29萬元。

牽晴實呎萬元破頂

另外，將軍澳呢幾日連錄7宗買賣。而利嘉閣梁德盈講，有個客先560萬元賣咗長沙灣泓景臺8座中層D室，之後再以855萬元買番同屋苑2座中層B室。

其實佔中對上車盤個價最無影響。美聯陳梓彬話，牽晴間呎價終於做到1萬，有個外區買家，以388萬元買入屋苑11座高層H室，實用面積388方呎計，呎價1萬元，創屋苑呎價新高。

中原冼詠恩都話，屯門盤少，個價有升無跌，新都大廈A座低層7室都賣到336.8萬元，實用呎價7,620元，創屋苑新高。