十月進入最後一星期，港交所（00388）昨確認滬港通依然未有通車的時間表，市場謠言滿天飛。當然大部分人會聯想到，總理李克強半年前預告十月通車的港滬股市互聯互通，主要受近期香港的佔領活動影響，因而延後。但睇番恒指與佔領行動爆發前的九月二十六日收市相比，其實只跌了1.5%，不受影響的國企，同期國企指數反而跌了1.8%。可以看到，影響是心理大於實際。

環球債息急跌，內銀股趁機發優先股補充資本。（資料圖片）

太陽日誌

大行對建行業績預測（人民幣）

反而是，中國第三季GDP、九月發電量數據，及十月初的內房銷售數字，沒有預期的進一步轉壞，阿爺大型放水的機會大減，股市缺少一個炒作藉口，加埋滬港通未能如期通車，大孖沙入市意欲降低，港股成交有愈玩愈縮的情況。

上周五恒指未能享受到周四晚美股大反彈的好處，收市跌30點，報23,302點，主板成交縮到501億元，在恒指逐漸在兩萬三水平見支持，十月初的22,565點，可能見了中短期低位的機會唔細。

聯通業績繼續改善

第三季業績好過預期的中國聯通（00762），上周五反彈1.2%收報11.06元。老實講，史提芬有些少失望，尤其見佢開11.06元，抽上11.34元，收市番嚟開市嗰口價。有電訊分析員認為，聯通純利因為補貼減少而超預期都唔夠，營業額減少下，超額完成的業績變得意義唔大云云，姑勿論點，市況麻麻，雞蛋裏挑骨頭的情況難免，預期手機補貼見頂對業績的幫助，未來幾季仲會繼續浮現。

另一業績表現唔差，股價唔行要數內銀股，打頭陣出季績的建行（00939），首三季賺1,902億元人仔，按年升7.8%，市場關注的不良貸款比率升0.14個百分點去到1.13%，如果撇除收購巴西BIC銀行帶來的54.39億元人仔壞帳，實則建行不良貸款率為1.07%，微升0.03個百分點，一級資本比率改善至11.65%。

講幾多倍PE無咩意思，但筆者維持內銀股可投機、不太啱投資的睇法，依家買得落去，主要賭銀行資產質素企穩，同埋放水周期即將展開。近日中國CPI跌到四年半低位，加上GDP預期今後兩年進一步放緩，中國進入減息周期只係遲早問題，天時之助係環球債息急跌，幫埋內銀發優先股補充資本，博反彈仲係以內銀股相對穩陣。

雅士利有機炒多浸

近排奶粉股雅士利（01230）異動，由年半低位2.07元彈到2.92元，經過兩星期橫行，上周五又急抽6.3%至2.84元，低位升37%。雅士利前大股東張氏國際，一三年向蒙牛乳業（02319）出售18.26億股時，選擇每股2.82元現金，加非上市蒙牛國際股份的收購方案，啱啱宣布行使交換權，換番8.53%或3.03億股雅士利番嚟，但會以獨立第三者身份持股，將非上市股份換番雅士利，市場對消息反應咁激烈，真係丈八金剛、摸不着頭腦。

話時話，蒙牛收購，再搵埋淡馬錫入局，雅士利股價炒到上5.5元後級級落，去到最低位，最多跌掉六成二。今年奶粉市場不單只無因為一孩政策鬆綁而向好，反而因為外來品牌降價，內地品牌受到極大的考驗。

上半年雅士利業績跌兩成八，賺2.09億元人仔，最淡的野村估全年只係賺3.39億元人仔，即係下半年仲要跌，花旗估賺4.65億元人仔，攞個中間數，一四年PE 18.6倍，估值就麻麻哋，要對奶粉業見底先可以支持現時估值，不過，睇圖就行得好靚，如果破咗2.92元，唔排除炒多浸。始終，淡馬錫入貨價都要3.5元，心理上仲係比佢買得平。