醫藥板塊中，除四環醫藥（00460）的研發實力超班外，康哲藥業（00867）亦都唔輸蝕，睇佢股價係咁破頂、市場肯畀高估值就知，尋日即市一度挾到去13.88元，埋單仍升2.2%，收報13.68元，滬港通開車在即，睇好佢可以受惠，15蚊關指日可待，支持喺12.3元。

康哲主打處方藥的營銷、推廣及銷售，擁有旗艦產品「黛力新」同「優思弗」，收入佔比分別為近三成及近兩成。公司業務模式包括直接網絡同代理商網絡，分別在內地營銷9及14個產品、覆蓋全國超過16,000及7,000家醫院。今年上半年營業額及純利一樣增三成，分別至13.6億元及4.1億元人仔，原因係產品銷量增加、售價無重大波動。

另外，截至六月底止旗下九個產品正在進行註冊，同時擁有部分自主產品，用於治療原發性肝癌的「酪絲亮肽」，已經完成III期臨床試驗，未來有望推動業務持續增長。公司不斷加強授權產品的穩定性同可控性，並透過學術性專業培訓去支持網絡的縱深發展，可見產品引進同網絡發展，乃其兩大核心戰略方向。