上車盤難求，樓價愈升愈有。鰂魚涌單幢樓富景閣高層無海景單位，實用面積約198方呎，呎價竟賣到成1.53萬元，貴過同區藍籌太古城。而黃大仙新光中心兩房單位，最新紀錄售價亦推高至428萬元。

樓價續升，二手市場屢錄高價個案。（資料圖片）

上車盤近期高價成交個案

當樓市最指標嘅屋苑鰂魚涌太古城，今個月平均實用呎價都係做緊1.4萬元之際，有代理同劉Sir講，同區單幢樓富景閣有個高層F單位，建築/實用面積只有279/198方呎，無海景，業主敢開價310萬元，最後賣咗303萬元，建築/實用呎價10,860/15,303元，貴過太古城。早排太古城兩房則王先至賣緊878萬元，破紀錄實用呎價都只係約1.51萬元。

粉嶺名都實呎過9千

富誠地產林栢榮都話，新光中心2座高層F室兩房單位，實用面積約382方呎，都賣成428萬元，成為屋苑「最貴」單位，實用呎價約11,204元。

六福行蔡惠娟都話，粉嶺名都5座低層E室，只係減咗6萬就賣360萬元，實用呎價9,023元，呎價創下屋苑新高紀錄。創富物業張銘均話，同區公屋華明邨6座高層22室，還價減3萬包埋補地價賣257萬元。

美聯嘅老友梁仲維話，荃灣廣場2座中層E室，單位實用面積約433方呎，放盤唔夠十日，減價33萬賣497萬元，高過銀行估價至少17萬元，實用呎價要11,478元。

有人爆料，同區樂悠居有個發生過事故嘅中層單位，賣咗422.8萬元，雖然低過市價，但實用呎價都過9,700元。

置富交投今月增1倍

祥益袁思賢話，內地客為咗個仔嚟香港返學，用383.8萬元買咗屯門怡峰園5座低層D室，再另俾近75萬元辣招稅。

中原何鎮宇講，薄扶林置富花園今個月已經有6宗買賣，多過上個月一倍，其中4座中層G室三房單位，賣咗740.8萬元，實用呎價約12,599元。