租金跟隨樓價一路咁升，已經連續四個月創有紀錄以嚟歷史新高。九月份100個大型私人屋苑平均建築呎租升到24.8元，租金連升五個月，累積升咗9.3%。另外，信置（00083）都話旗下屯門黃金海岸住宅租金比年初亦升約5%。

信置潘發柱（左）表示，不少業主賣樓後轉投租務市場，帶動黃金海岸住宅租務成交急升。

主要藍籌屋苑平均租金統計

劉Sir聽中原黃良昇講，根據佢公司新簽租約統計，上個月100個大型私人屋苑平均建築呎租約24.8元，比起八月份再升2.1%，連續四個月創有紀錄以來歷史新高。若果同舊年十月份平均23.1元比較，租金十一個月累升7.4%，而一二年十月到一三年十月，一年間累升4.1%，相信明年嘅差餉會顯升。

黃埔嘉湖季漲一成

按季嚟睇，第三季平均建築呎租約24.8元，比起第二季升咗6.9%，升幅係八個季度最大；租金連升兩季共升9.3%，亦係連續兩季創有紀錄新高。

以十大藍籌屋苑嚟睇，第三季租金表現最好係紅磡黃埔花園同天水圍嘉湖山莊，各升10.5%同10.4%，表現最差係柴灣杏花邨，按季租金升2.8%。

美聯劉嘉輝都話，以佢公司新簽租約嚟睇，月租萬元或以下嘅比例由○九年超過五成，一路跌到今年頭九個月嘅15.3%，創咗有紀錄以來新低。

整體租務市場唔錯，發展商都趁勢推啲單位招租，信置旗下屯門黃金海岸海灣別墅全新複式連天台大宅，昨開始接受預約參觀，呢類單位實用面積2,195方呎，月租6.58萬元起。新租客如果承租複式連天台大宅可享免費月租車位1個。十月份海灣別墅成交實用呎租約27至30元。

黃金海岸旺租60宗

信置租務部聯席董事潘發柱話，近日唔少業主放賣物業套現之後轉投租務市場，帶動黃金海岸住宅租務成交急升，九月份已錄約60宗租務成交，租金比年初升約5%。現時，屋苑海景住宅兩房單位月租1.28萬元起，實用呎租24至26元，三房戶實用呎租22元起。