隔晚美股顯著下跌，恒指尋日低開227點後，早段仲力頂23,000點關，但晏晝跌勢加劇，埋單跌239點，以22,900點收市，國企指數則跌99點，以10,185點收市，全日主板成交685億元。

展望中央未來仍會積極批出鐵路項目，北車股價有機會再試高位。（資料圖片）

中國北車股價走勢

券商預測北車業績（人民幣）

阿莊100萬元投資組合

事實上，近排市場負面消息多多，上周IMF調低全球經濟預測，而內地及美國公布的經濟數據差強人意，加上油價近日急挫，都響起了跌市警號。道指自九月中旬升上高位後便現疲態，上周大上大落，由於已經跌穿咗250日線，睇嚟跌浪先啱啱展開。

淡友顧忌滬港通

相對美股，近排港股表現都算硬淨，始終「滬港通」開通在即，淡友都有所忌憚，惟恒指近日明顯受制於250日線23,177點水平，一日未上得番去，後市都未許樂觀。尋日主板有990隻股份跌，只有289隻升，而睇番近日數據，好多時出現大市升，但下跌股份數目佔多數的情況，反映市場信心都係麻麻。

內地日前公布的CPI及PPI數據遜於預期，市場憧憬中央短期內會推出新一輪刺激經濟措施，加上「四中全會」即將舉行，市場焦點當然落在國策股身上，日前推介的海東青（02228），表現果然對辦，尋日一度高見3.88元，惟最後不敵市況，倒跌2.66%，以3.66元收市。

發委會昨日公布了三項鐵路項目批覆，總投資額近千億元人民幣，建鐵路股成市場焦點，中國北車（06199）逆市創7.34元上市新高，收7.22元，升4.94%，至於中國南車（01766）更升近6%，以7.51元收市，至於中國中鐵（00390）及中國鐵建（01186），則分別升4.3%及3.35%。

高盛唱好睇8.3元

由於內地經濟仍然不振，估計中央未來仍會積極批出項目，基建鐵路股可望繼續跑贏大市，北車股價有機會再試高位。公司已連續三年位居全球軌道交通裝備行業冠軍，實力毋庸置疑，而高盛近日亦發表報告，唱好相關行業之餘，同時予北車買入評級，十二個月目標價8.3元。

昨日北車成功突破7.1元阻力，創7.34元新高，成交亦見配合，惟大市近日表現反覆，不排除股價會有調整，故現階段毋須急於追入，可待回落至7元附近水平才作中線吸納，料不難升抵高盛目標價。