近排樓市氣氛受「佔中」影響，成交少咗，但做價暫時未見受累，高價成交個案依然係咁出現。好似有香港後花園之稱嘅西貢，優質村屋一向唔憂賣，所以分分鐘都會出現創紀錄價錢。劉Sir收到風話相思灣有幢村屋以1.3億元天價賣咗，建築呎價約6.19萬元，做價及呎價均創全港村屋新高紀錄，比一○年西貢村屋舊紀錄高咗超過90%。

西貢相思灣位置優越，區內村屋屢錄高價成交。（資料圖片）

西貢部分高價村屋成交

世紀21奇豐廖振雄話，相思灣日前有幢單號屋以1.3億元售出，呢幢屋位置優越，單邊望全海景，私隱度極高。

地段私隱高 放盤難求

據聞，今次個買家喺各區物色靚盤已經超過一年，因為心儀上址環境佳，私隱度極高，加上同類物業可遇不可求，價值唔係一般村屋可以媲美，所以決定入市。

廖振雄又話，呢間屋建築面積2,100方呎，附有入契大花園及裝修，建築呎價約61,905元，做價同呎價都創咗全港村屋新高。而原業主於○六年揸到依家，期間升值近2.8倍。

至於相思灣一直作區內高價村屋嘅溫床，唔少名人都曾經喺度住過，好似謝賢與狄波拉早年就買咗幢相思灣村屋居住，不過佢哋間屋喺八八年就以250萬元賣咗比個歐洲國家嘅領事，若然揸到依家，可以多賺51倍。

另外，劉Sir喺土地註冊處睇到，九龍站君臨天下2座中層B室以3,901.2萬元沽出，買家叫蔡文胜（CAI WENSHENG）。上述買家同有「中國站長之王」之稱嘅蔡文胜同名。

根據該處資料，中半山地利根德閣第1座低層B室以4,002萬元售出，買家SKY TOP INVESTMENT （HK） LIMITED。間公司董事包括馮耀輝及馮依琪。

劉Sir留意到分層豪宅，呢排交投就靜咗啲，不過做價都仲幾穩健。

薄扶林分層3730萬沽

美聯方玉冰話，薄扶林碧荔道65號低層戶，實用面積約2,238方呎，由一個外地回流返嚟嘅買家以約3,730萬元連車位買入，實用呎價約1.67萬元。

該行李紹聰話，小西灣藍灣半島6座高層D室，單位實用面積約847方呎，以約1,408萬元售出，實用呎價約1.66萬元，係同類型單位高價承接。