公屋原意係為基層市民解決住屋需求而建，但係都敵唔過樓市魔咒，市場終於歷史性出現首宗呎價破1萬元的公屋成交。呢個新公屋王係黃大仙鳳德邨，啱啱有個實用面積只得160方呎嘅迷你單位，以自由市場價168萬元賣出，實用呎價高約1.05萬元，呎價創咗全港公屋新高。

黃大仙鳳德邨有迷你單位，錄得以自由市場價168萬元成交。

粉嶺華明邨的「公屋王」寶座僅維持了一個月。

公屋呎價排名榜

劉Sir啱啱收到風，話鳳德邨黛鳳樓有個低層嘅迷你單位，實用面積只係得160方呎，近日連埋補價賣咗成168萬元，實用呎價達10,500元，呎價貴絕全港公屋之外，更加係全香港首間呎價過萬元嘅公屋單位。

收租料8千 投資客吼實

對上呎價最貴嘅公屋王係粉嶺華明邨一個開放式單位，上月以148萬元賣出，成交實用呎價9,867元，紀錄只係保持咗約一個月，今次新紀錄呎價再高約6.4%。

其實鳳德邨個位置近住港鐵站，加上要唔駛200萬已經可以入市，基本上喺市區私樓市場無咩可能買到。

有代理仲話，之前有個面積差唔多嘅同類單位放盤，自由市場叫價去到成222萬元，其實班投資者一路都吼住呢類單位，事關閒閒地租金都收到7,000至8,000元，所以過往一有放盤就即刻有人接貨。

有人更爆料，今次成交單位雖然連埋地價轉手，但其實要再搵個啱價嘅同類放盤都好難，所以業主亦係未補地價前，已俾有意買家以自由市場價洽購，之後至補番地價賣樓。

黃大仙下邨 減價仍新高

睇番近排啲公屋成交，因為涉及單位樓價唔高，所以成交價就畀市場愈推愈高。富誠地產林栢榮話，同區黃大仙下邨今個月有1宗成交，單位係2座高層10室，建築/實用面積約526/407方呎，望樓景，綠表價賣成225萬元，雖然減咗價25萬元，但都係同類綠表市場新高價，建築/實用呎價約4,278/5,528元。

同區另一個公屋屋苑竹園北邨，近日都有買賣成交，世紀21富山劉倩彤稱，屋苑梅園樓中層12室，建築/實用面積685/531方呎，屬於三房單位，望樓景，綠表價賣245萬元，已經比開價低咗5萬元，建築/實用呎價約3,577/4,614元。