近年發售的市區精品豪宅或商廈都備受用家及投資者追捧。興勝創建（00896）同劉Sir講，佢哋部署喺十月底至十一月先後推出2個市區項目，其中近未來高鐵總站嘅西南九龍住宅項目The Austine Place，短期會攞到入伙紙，項目以現代新英倫風格打造。而中環荷李活道嘅服務式寫字樓CentreHollywood會跟住推，其中高層單位每方呎意向價約2萬元。

興勝項目管理周嘉峰指，The Austine Place提供42個精品豪宅單位，單位實用面積約900方呎。

興勝創建旗下項目最新情況

興勝項目管理董事周嘉峰話，旗下The Austine Place短期會批到入伙紙，預計最快十月底可以賣，項目提供42個精品豪宅單位，單位實用面積約900方呎，屬2套房連工人房設計，會以現代英倫風格打造。

佢又話，由於The Austine Place近高鐵總站，加上食肆林立，所以計劃將平台打造成可提供零售及特色餐飲等，同時會保留長線收租，另外，項目亦設有4個地舖，其中一個係連1樓全層。

CentreHollywood呎租60

至於緊接喺十月底至十一月登場嘅服務式寫字樓CentreHollywood，周嘉峰話，依幢商廈樓高26層，預計會以全層形式拆售，每層面積約1,300方呎，高層單位每方呎售價約2萬元。

其中做緊示範單位嘅23樓全層，新近以月租7.1萬元租出，呎租60元，創該區新指標，該層單位會以連租約方式出售，上址現租客包括有室內設計公司以及紅酒貿易行等。

佢補充話，集團今年二月投得嘅火炭半山豪宅項目，正式命名為Mount Vienna，項目總樓面近2.7萬方呎，料明年初動工，預計一七年落成，項目以大單位為主，冀打造成同區最高檔嘅豪宅物業。

大角咀工廈累沽六成

政府重推工業地，反映睇好工廈市場，興勝創建旗下大角咀工廈THE BEDFORD，至今暫已售出60%單位，套現超過2.5億元，其中22樓單位呎價創西九龍新高，達到每方呎7,400元。

周董又話，由於公司看好高鐵通車效應，餘下單位會善價而沽。