政府為咗增加供應，近幾年好積極咁推地，令到庫房有穩定嘅賣地收益。劉Sir計一計，原來上季埋單，政府共批出咗8幅住宅同商業地皮，合共涉及金額約145.59億元，對比第二季多咗約40%，已經係連續九個季度有超過100億元收益。不過，如果今季希望做到百億十連霸，就可能會有啲難度。事關全季最具規模嘅大埔白石角科進路住宅地，估值都只係約23.62億元。

尖沙咀中間道商業地成交價逾46億元，為上季售價最高的政府地。（資料圖片）

政府賣地收入連續九個季度破百億

睇番資料，今年第三季一共批咗8幅住宅及商業地，相比第二季批出9幅，少咗1幅，不過由於有部分係貴重項目，所以總成交金額按季不跌反升，錄到約40%升幅，合共有約145.59億元。

中間道值錢破紀錄

期內最貴重嘅地皮係尖沙咀中間道商業地，成交價46.88億元，比市場上限估價高咗約4%，項目每方呎樓面地價約1.38萬元，無論係售價抑或呎價，都破盡政府商用地皮賣地嘅紀錄。

呢幅地由恒地（00012）投得，發展商話，呢幅地好靚，如果用嚟起酒店會浪費，所以已經有明確嘅發展意向，諗住重建做銀座式商廈，發展上可以有較大彈性，總投資額約莫65億元。

除咗中間道之外，上季另一幅較值錢嘅就係荃灣楊屋道商業及住宅綜合地皮，地價39.398億元，幅地由億京發展爆冷攞到，係佢地集團第一次投到政府嘅住宅項目，總投資預計超過百億元，住宅部分會按要求提供最少790個單位，至於商業樓面暫時就未定用嚟做寫字樓定酒店。

今季要維持過百億元賣地收入其實會有啲困難，事關政府暫時只安排咗4幅土地喺今季截標，全部都係本財政年度第二季（七月至九月）公布會推出嘅地皮。

今季四地僅值72億

當中較具規模係曾經流標嘅白石角科進路住宅地，幅地會喺今個月二十四日截標，最高估值約23.62億元，已經係呢季最貴重嘅地皮。

連埋今個月截標嘅東涌第53a區酒店地、下月截標嘅鯉魚門徑限量地同屯門第4區景秀里限量地，4幅地皮估值合共最多約72.28億元。

不過，如果今季賣地計劃嘅地皮趕唔切安排喺今年底前截標，季度賣地收入逾百億元的紀錄就將會斷纜。