多事之秋，港股有難！身處大時代，散戶宜提高風險意識。不過，有國策支持的中資股，基本因素受事件直接影響不大。呢個月A股軍工股炒得熱騰騰，航天系就炒重組概念，可以關注。

尋日能逆市報升的股份僅175隻，包括幾隻與十大軍工集團相關的股份。航天科技（00031）升2.6%、航天萬源（01185）升4.3%、中航科工（02357）雖然尾市有回吐，但即市亦曾高見5.85元。不過，論升幅同人氣，表現最佳的是中航工業（00232），收報0.82元，升9.3%。

呢系股炒起，主要係受中航工業集團資產重組的消息刺激。有指中航工業集團擬一拆二，並將於年底前完成分拆重組。市場憧憬圍繞大型軍工集團的資產重組消息陸續有來。

論股價走勢同人氣，中航工業都值得留意，上周開始起動，但真正大成交係尋日，成交達5.01億元，過去六個交易日最多經已翻咗一番！去到現水平有畏高係好自然，如果守得住0.75元，都仲有機會再試高位0.89元；但若未能守其上，則宜觀察低位承接，再謀定而後動。