普選爭議愈搞愈大，家陣都唔知點收科，但肯定的是投資者已身受其害，恒指尋日低開278點後跌幅擴大，仲一度跌穿250日線，低見23,095點，最多跌583點，尾市略為反彈，成功收復250日線，但全日仍然要跌449點，以23,229點收市，國企指數則跌145點以10,439點收市，主板成交889億元。

內地對優質營養保健品需求持續增加，為瑞年提供利好經營環境。（資料圖片）

從技術走勢睇，恒指已經下試250日線，加上9RSI亦跌至19的超賣水平，理應有技術反彈，但係家陣牽涉政治因素，如果事件持續惡化，難保大市唔會進一步尋底。雖然，有人話富貴險中求，但係阿莊一向比較保守，始終留得青山在，故現階段宜控制持貨量，將風險減至最低。

尋日地產股及收租股成重災區，股價普遍跌超過3%，另外港交所（00388）亦跌逾3%，主板全日下跌股票多達1,299隻，升的只有138隻。

壹照明貨源歸邊

尋日首日掛牌的壹照明（08222），表現相當突出，最後以4.1元收市，較配股價0.5元急升7.2倍，升幅認真驚人。公司為本港燈飾與設計師品牌家具和配件產品零售連鎖店，股價表現強勁，皆因股份是以配售形式上市，貨源歸邊自然容易炒起。但尋日已經升咗咁多，相信咩利好因素已經反映晒，所以不建議投資者沾手。

除咗壹照明之外，尋日都有股份逆市走強，好似隻瑞年國際（02010），逆市升2.69%，以2.67元收市。事實上，自集團公布中期業績後，股價一直反覆向上，九月中更一度升過上2.92元高位，之後回落，惟跌至2.45元水平現承接。

上半年公司旗艦產品氨基酸片銷售增長理想，其他營養保健品銷售表現亦不俗，帶動中期營業額上升5.3%至10.53億元（人民幣．下同），股東應佔溢利則增加25%至3.55億元。期內集團致力開拓零售網絡，旗下保健營養產品內地第三方零售銷售點增至約75,000個，同時亦開拓了多家大型連鎖超市，醫藥產品亦已銷售到約400家醫院。

內地民眾對優質營養保健品的需求持續增加，為瑞年提供利好的經營環境。下半年公司計劃推出多種保健營養新產品，相信對提高銷售有正面幫助，盈利前景樂觀，但在目前市況不明朗下，現階段宜先列作觀察名單，不宜急於買入。