大市持續向下，恒指上周五跌穿埋條100日線，最後以23,678點收市，全日跌89點，國企指數亦跌55點，以10,584點報收，主板成交金額667億元。今個禮拜有兩日假期，加上大市氣氛唔好，而且經過上個禮拜中國天然氣（00931）大跌一役，投資者都變得戰戰兢兢，大大影響入市意欲。

中航系股份近期因軍工概念而大受追捧，中航科工表現相對落後。（資料圖片）

禮拜五濠賭股雖然見反彈，但呢排相關股份往往都係彈完再插，弱勢已成，每次反彈都應該視作逃生機會，而唔係買貨時機。由於好快就踏入十月呢個傳統股災月，加上恒指已失守100日線23,791點水平，若然短期上唔番去，估計有機會下試250日線23,173點。

華新能可趁低吸

電力設備股延續強勢，其中上海電氣（02727）再升超過5%，以4.33元收市，果然有政策配合，走勢都強啲，反而點題的華能新能源（00958）表現一般，隨大市跌2.58%，以2.64元收市，但阿莊覺得只要佢守得住100日線2.62元水平，可以趁低收集。

另外，阿莊之前提過隻新澤控股（00095），因股權易手關係，公司今日會正式改名為「綠景中國地產」，近日股價由低位穩步回升，周五逆市升1.5%，成功上番2元樓上，不排除正式「正名」之後，股價會進一步做好，不妨望多兩眼。

中航系因軍工概念股受捧，近日表現突出，中航工業（00232）在憧憬重組下，上周五再急升25%，以0.75元收市，而中航科工（02357）則升4.33%，收以5.77元。前者在雙重概念下，近日已累積龐大升幅，反觀中航科工則穩步向上，料股價仍有上升空間，追求穩健的投資者，不妨考慮買入。

有消息指中航工業集團計劃一分為二，航空發動機製造業務將分拆成獨立公司，料今年年底前完成，而中航科工旗下於上交所上市的A股哈飛股份（600038.SH），將設立全資公司以拓展航空產品業務，預計類似的重組消息未來會陸續有來，支持中航科工股價做好，目標可望挑戰6元關口以上。