投資SUN角度：半新股尋寶攻略

最近三個月掛牌的新股，表現普遍不俗。在十月滬港通開通之下，魚缸資金可望維持相對充裕，有利新股炒作，而近期有二、三線股股價大幅波動，部分流出資金轉投股價冇歷史包袱的新股。投資者除可認購新股外，亦可留意半新股表現，一旦博中坐上順風車，回報都幾和味！

其實，打從五、六月內地開始着手改善市場流動性，維穩經濟以來，六月份已見到香港新股市場開始出現小陽春。

捕捉對沖基金手影

踏入第三季，指數創出近年新高，交投轉趨活躍，不少公司把握時機上市，初步估計七月以來上市新股有35隻，其中包括政府新一批債券（04222），創業板7家，至今累計升幅達64%至16倍；主板27家，其中13隻累升幅度介乎10至108%不等，可見表現相當不俗，但當然，唔係隻隻新股都會炒起，看官揀對象想增加勝算，就要掌握炒作法門。

機構投資者都分好多類，傳統長線基金大家都聽唔少，但對沖基金為追求絕對回報，積極入場炒作，尤如一個大炒家。若然半新股見到呢類大戶身影，頗大機會係等炒格！

以季內上市的先達物流（06123）及世紀睿科（01450）為例，獲近年熱衷於買賣二、三線股的機構投資者──Rays Capital持貨，兩者現價已較發行價分別累升98%及29%。世紀睿科升幅仍相對溫和，若基金再度增持，股價有機會再破頂。

不過，食得鹹魚要抵得渴！呢類尋求絕對回報的對沖基金，多數是中短線買賣居多，較少作長線的持有，當持貨帳面回報率到達一定水平後，基金沽貨獲利的動作又可以來得好快，投資者要金精火眼睇實盤路，一有出現異常大型沽盤，就要識得落車！

其實，呢期有睇頭的半新股，唔少都並非一掛牌就大炒，反而係橫行上落一頭半個月，先至「吹雞」開車。

正如康達環保（06136）、科通芯城（00400）、恒寶企業（01367）、世紀睿科，都曾經略穿發行價，但低位買盤不缺，好快重上水面，橫行個多月，當成交突然大增，就係開車訊號。能否押中寶，就要睇看官的耐性同觀察力。

新股一般會設有超額配股權，以供保薦人在新股超額認購時，可代表國際買家行使超額配股權。

換句話講，獲全面行使超額配股權，顯示公司招股反應好，而股價在掛牌後，即使未有大幅飆升，等消化短線獲利沽盤，收夠籌再開車的可能性較高。季內上市的城建設計（01599）及綠葉製藥（02186）均獲行使超額配股權，股價做好，都係典型例子。

總括而言，要揀半新股，仍有不少考慮因素，投資者須綜合分析，靈活走位。過去某些保薦人的名字有叫座力，但近年已較少見，即使外資行做保薦人，市況唔配合，認購者一樣可以輸鑊甘！所以如今以保薦人來推斷新股值博率，準繩度要打折。

神州租車醞釀突破

畢竟保薦人都係做生意，如今的新股規模難同往日的大國企比較，亦難望如國企般做好今趟IPO可博上市後繼續有併購大刁跟尾，故如今的保薦人都係睇餸食飯，好難話可以包保認購客戶「必賺」﹗

除考慮以上三項因素外，當然最終股價表現，還是取決於公司業務發展，若有利好消息拉升估值，股價自然受追捧。上市不到兩個月就落實收購項目的綠葉製藥便是好例子。

回說近周上市的新股，創業（02221）都算快開車，同日上市的神州租車（00699）亦似要醞釀突破，是否預示呢轉新股炒風會由「慢熱」變「快攻」，不妨拭目以待。

至於上周四掛牌、從事餅乾製造的嘉士利（01285），以及上周五掛牌、從事水務供應的強泰環保（01395），都屬中小型晒士，但兼具環保國策概念，始終較合炒家胃口，從強泰首日掛牌收市價較發行價飆七成，而嘉士利掛牌首日最多升過12%後，翌日即回落至接近發行價收市，便可見一斑。