港股連現十二支陰燭，日線圖各項技術指標都極為超賣下，尋日終於見反彈，恒指收市升84點，報23,921點，主板成交752億元。

恒指期貨走勢

至於即月期指日市收23,878點，低水43點，成交9.6萬張，轉倉進入高峰期，十月期指收23,856點，低水65點，成交5.17萬張。

昨日終於可以按計劃入市博反彈，當收市現貨高於2日線23,879點，筆者動用三分一注碼，以平均23,870點買入十月期指好倉。昨日指數反彈幅度唔大，但至少使9日RSI回升至32，底背馳能否在未來幾日發揮作用，看近日愈來愈多分析轉向唱淡睇23,500點甚至23,000點，因應滬港通而盲目睇好的分析也成絕響，估計今次震倉應該接近尾聲。

不過，筆者再重申今次開期指好倉，不敢盲目睇好預測指數見新高，純粹博短期技術反彈。港匯初見轉弱，執筆時見7.7520，是七月下旬以來首次，透露湧入港股的熱錢減少，以恒指25,362點短期浪頂，到昨日低位23,788點，0.236、0.382以及0.5反彈阻力分別在24,160、24,390以及25,757點。