唔理係公屋定係豪宅，現時面積愈細嘅樓就愈矜貴。將軍澳公屋景林邨就有一個開放式單位，以實用面積每方呎叫價近1.5萬元放緊，點止貴過同區新盤開價，直情係公屋「豪宅價」，可見業主信心爆棚，擺明唔憂賣；而黃大仙公屋鳳德邨都有個開放式單位，依家叫緊每方呎近1.4萬元。

將軍澳景林邨有開放式單位，實用呎價叫價近1.5萬元。

黃大仙鳳德邨一開放式單位以222萬元放售。（資料圖片）

超細公屋超貴放售

世紀21將軍澳曾志雄講，上述呢個景林邨景桃樓開放式公屋單位，實用面積只得164方呎，由於業主對後市有信心，三月時已經叫價245萬元放盤，實用呎價約14,939元，其實個單位都幾好租，月租最少租到7,000元。

鳳德每呎嗌到13789

尋日劉Sir睇過呢間「豪宅」，內籠都幾企理，加埋高層景觀開揚，之但係用同樣呎價水平，其實都有唔少貨揀。

好似同區新盤天晉IIIA首批單位開價，平均實用呎價都只係1.33萬元，若果用萬五蚊一呎價呢個價，相信西九龍豪宅都有貨揀。

萬元公屋又點止一間，富誠地產陳錫金話，鳳德邨碧鳳樓有中層開放式放盤，實用面積161方呎，叫價去到222萬元，實用呎價13,789元；而區內公屋近期交投表現都唔錯，好似竹園北邨14座高層12室，係罕有大則放盤，以248萬元賣咗。

睇番資料，其實公屋都有價有市，好似香港仔華富邨華廉樓，早排都有個單位以差唔多343萬元賣咗。

至於私樓方面，美聯陸家民稱，屯門單幢樓好勝大廈高層單位，實用面積311方呎，由新婚買家以243萬元買入，實用呎價7,814元，創新高。

灣仔價細盤剩七個

中原李志豪講，灣仔平過500萬元嘅鎖匙盤倒數得番7個，最近興邦大廈高層一房戶，買家無睇樓就以398萬元連約買入，實用呎價1.35萬元。

名采策略姚雲龍稱，北角嘉威大廈連續有兩個一房單位以高市價賣出，實用呎價都過1.4萬元。

細價屋苑繼續熱搶。中原馮澤源稱，沙田希爾頓中心B座低層5室，3個準買家狂搶，最後以317萬元賣出。美聯周志強指粉嶺牽晴間8座中高層三房戶賣咗630萬元，實用呎價8,824元，創同類新高。

富誠地產林栢榮話，牛池灣居屋嘉峰臺4座低層三房戶，未補價都賣450萬元，實用呎價約7,640元，創同類新高。消息話，屯門海翠花園4座低層G室賣500萬元，創屋苑新高價。