近年內地個人遊旅客轉攻中低檔貨品，令核心購物區商戶類型開始洗牌。劉Sir最近聽到，近排繼續搶租一線街舖嘅藥房，成功租咗銅鑼灣記利佐治街同怡和街交界位地舖，月租65萬元，呎租約3,250元，贏晒珠寶行、金行同鐘錶店，位列呎租舖王第二名，係近年罕見。

銅鑼灣記利佐治街同怡和街交界位地舖，月租達65萬元。

本港五大最貴呎租舖位

銅鑼灣又多一間藥房，有代理報料，最近有藥房以約65萬元承租記利佐治街同怡和街交界大單邊地舖連閣樓。

個舖喺正區內中心點，前面就係班馬線，人流多，今次租期約兩年，以個舖地下建築面積約200方呎計，呎租約莫3,250元，呎租排名衝上全港呎租舖王三甲位置，搶贏左珠寶行、金行及鐘錶行等等高檔奢侈品商戶。

排名只係僅僅輸俾同區景隆街雙號A2號地舖果間找換店，果間舖面積約50方呎，租金成26萬元，呎租就成5,200元。

依個舖早年曾經租畀一間創業工業集團，當時實用呎租約八千幾，之後間工業集團就將個舖再分租出去，租期通常幾個月或者幾個禮拜咁短，由於個舖同時設有大型電子屏幕，所以吸引企業短租作產品宣傳用途。

同區租賃暢旺

同區近排啲租賃成交都幾旺，有市場消息話，怡和街單號地下B號舖，面積約430方呎連430方呎閣樓，獲手袋店以月租約38萬元承租；渣甸街雙地舖及1樓，面積約1,200方呎，就獲得保健食品店以約17萬元承租。

不單止舖市旺，商廈市場亦不俗。香港置業曾旭暘話，尖沙咀金帝行6樓全層，面積約1,952方呎，以約1,500萬元沽出，呎價約7,684元。

海富連沽三伙

中原謝立生亦話，金鐘海富中心一座26樓拆售反應唔錯，有買家斥資約9,217萬元連環買咗3個單位自用，樓面加埋成3,783方呎，其中09室，面積約1,860方呎，呎價最高約24,980元，創咗該廈呎價新高紀錄。另有消息話，該廈2座低層07室，以呎價16,285元售出。