阿里巴巴上市夠晒架細，上市價68美元，即市最高見過99.7美元，最後收93.89美元，比招股價升38%。上市之後，阿里超越Facebook，成為僅次於Google的全球第二大互聯網公司，以馬雲上市將1,275萬股套現，兼仲揸住7.8%股權計，阿里令馬雲變身中國首富，帳面財富暴升至265億美元。

內銀優先股股息率有一定吸引力，相信將得到好息之徒垂青。（資料圖片）

與此同時，阿里亦令到日本富豪榜首換位，阿里巴巴真正大股東即揸住32.4%股權的日本軟銀，佢大股東孫正義當年的2,000萬美元的投資，今日價值暴升至580億美元，間接令佢成為日本首富，擁有資產達166億美元。

阿里上市，標誌着中國電子商貿發展的一個里程碑，由股市的認受程度及上市規模，阿里與騰訊（00700）雙雄鼎立的形勢更為清晣。留意到，今次阿里打破一個傳統，近年大部分中資股在海外投資者眼中，多少沾上一定程度政治及經濟放緩風險，偏偏佢丁點兒影響都見唔到。

阿里兩大股東腳軟

周末，幾個美國財經節目，評論人簡直將阿里奉若神明，睇好的理據大抵係投資中國電貿首選，及由估值出發，阿里一五年市盈率33倍（計埋上周五升幅）比亞馬遜及Facebook的70倍及35倍低。老實講，阿里的高速增長可以維持幾耐，實在好難講，短線股價得唔得，純講供求。

上周五見到，兩個阿里巴巴真正大股東，日本軟銀及雅虎已經有好消息出貨情況，收市倒跌收場，無視阿里直逼百美元大關的氣勢。似乎阿里估值即使有二度，甚至三度發育，一班之前曲線炒軟銀及雅虎的大孖沙，早已心裏有數，開始做緊反手。

港股終於有技術反彈，上周五回升137點收報24,306點，蘇獨公投被否決，大不列顛有驚無險，保持完整，意味英國急住脫離歐盟的風險暫可擱下。英鎊匯價即彈，滙控（00005）升1.69%收報84.2元，加埋騰訊在阿里掛牌前搶掃高1.8%，兩隻股票貢獻指數98點，佔大市升幅七成一。

新股標青 睇實美亞

講開新股，上周五上市的新股神州租車（00699），估唔到基礎股東團夠硬淨，果然有料到，首日掛牌收10.96元，比招股價8.5元勁升28.9%，由於隻股票超額過二百倍，配售亦都分得好散，唔少基金盤上周五力掃，消息話短期升勢有餘未盡咁話。

睇番八、九月，新股市場相當標青，就算唔數幾隻以倍數爆升的純配售私人派對，港銀控股（08162）、冠輝保安（08315）以及朝威（08059），之前的創業集團（02221）、博大綠澤（01253）、萬洲（00288）以及科通（00400），計至上周五，升幅亦介乎5至40%，真係有點始料不及。

今個星期有嘉士利（01285）及強泰環保（01395）掛牌，中廣核美亞（01811）本周仲未截飛，呢隻賣點係過半數組裝機容量，來自燃氣、水電及燃料電池，食正可再生及潔淨能源條水，往績市盈率15至16倍，比已掛牌的電力股8至10倍貴，價值投資者未必落到手，但新股客應該可以諗吓，一來上市盤數整得幾靚，經營效率持續見改善，今次集資主要用作收購，擴大潔淨能源佔收入比例，係佢另一賣點。

近日收到風，中國銀行（03988）可能係四大行之中，最早可以通過發優先股審批的一間。近期話就話美國退市，港美息口明年中左右可能就見底回升，但一班專攻內房高息點心債及美元債的好息之徒，依然為內銀優先股興奮不已。聽到賓架消息話，6厘左右已經有相當大市場需求，同之前估計介乎7至8厘低一截，如果咁嘅話，可以估計第一批十月出籠，內銀股有好大機會因為消息炒番一浸，短期要密切留意。