粉嶺聯和墟限量住宅地將會喺今個禮拜五截標，呢幅地皮係粉嶺區近四年嘅首幅供應。由於項目發展規模唔大，加上有新界東北發展效應，劉Sir都覺得會有唔錯嘅反應。而地皮估值最高約6.72億元，相信投得區內對上一幅土地嘅新地（00016），都幾有機會參與競投。

粉嶺聯和墟聯興街限量地，須提供至少二百五十個住宅單位。（資料圖片）

理想城市張聖典預計，聯和墟聯興街限量地可吸引中小型財團競投。（資料圖片）

粉嶺聯和墟限量住宅地資料

呢幅粉嶺聯和墟聯興街、和豐街與聯盛街交界限量地，佔地3萬多方呎，提供近21萬方呎總樓面，當中可以用嚟做商業發展嘅樓面佔約7.4萬方呎。

而項目亦須提供100個公眾停車位，有關面積會計埋落商業樓面入面，至於住宅部分就要提供至少250個單位。

劉Sir發現，粉嶺區唔經唔覺已經有成四年未有政府地皮批出，對上一幅已經係二○一○年九月底賣出嘅聯和墟粉嶺樓路住宅地，由新地以4.59億元拍賣投得，每方呎樓面地價大約3,029元，到依家仲係粉嶺地皮呎價最高紀錄，而項目最後發展為瓏山1號。

新地出手機會大

至於同年五月，香港小輪（00050）都拍賣投得粉嶺馬適路住宅地，當時成交價13.3億元，樓面呎價2,414元，即係逸峰嘅現址。

劉Sir認為，今次新地都幾大機會競投呢幅聯和墟聯興街限量地。

其實政府大力發展新界東北，相信對粉嶺樓市發展點都有幫助。

老友理想城市張聖典覺得，聯和墟聯興街限量地，雖然發展商要負責提供100個公眾停車位，又要保育「聯和市場」，令發展上會有較多局限。

樓面呎價料$3200

張聖典又話，不過，呢幅聯和墟聯興街限量地皮嘅規模始終有限，競投氣氛應該唔會差，可以吸引到中小型財團出價競投，估值約6.72億元。

即係折合樓面呎價約3,200元，係市場估值上限價，如果地皮真係以呢口價批出，將會成為區內呎價最高嘅地皮。