政府為咗增加住宅供應，近年積極發展元朗西鐵錦上路站同八鄉車廠一帶，希望變身成為新市鎮，令到周邊嘅農地都變得搶手。劉Sir屈指一算，近三個月已經有好幾幅元朗農地推出拍賣，反應仲相當唔錯，成交價比開拍價搶高咗逾五成甚至一倍。

元朗

張競達稱，新界農地發展有限制，呎價亦比較參差。（資料圖片）

過去三個月透過拍賣售出元朗農地

元朗錦上路自從有咗西鐵之後，交通確係方便好多，有老友同劉Sir講，依家政府為咗增加住宅供應以應付需求，將唔少新界土地嘅地積比率增加，無形中令到呢啲土地嘅價值大增，所以近排都有留意下啲農地，不過，要入市都唔容易。

石湖塘地每呎$741

事關近三個月至少有4幅元朗農地透過拍賣售出，幅幅都好搶手，起碼要搶高五成以上，先有機會買到。

最誇張係石湖塘丈量約份106號雙號地段之餘段，佔地4,764方呎，開價173萬元，終於以353萬元成交，足足高開價超過一倍，每方呎地價要741元。

今個月錦上路元崗丈量約份106號雙號地段，佔地7,327方呎，開價101萬元，成交價爭到158萬元，高開拍價56.4%，每方呎地價約216元。

不過，買呢類地其實都有風險，因為好多時得個「擺」字，唔知幾時先等到成個區大力發展，所以如果有心買農地博收購，最好都係買連租約嘅地，至少即時有租金收幫補吓。好似之前賣咗近八鄉嘅蓮花地丈量約份112號單號地段，佔地約2,222方呎，開價14萬元，最後以22萬元賣出，高開價57.1%，塊地連租約，月租約3,000元，計落租金回報率有約16厘。

「鄉村式發展」價值高

中原測量師行張競達話，新界農地發展受到城規會限制，即使獲准放寬土地發展密度，但係業主都要就發展補地價，所以農地價值未必會爆升。加上依家農地呎價比較參差，一般數十元到數百元不等，若然屬於「鄉村式發展」地帶嘅價值會較高，部分呎價可以去到超過1,000元。

佢認為，政府發展新界東北，將來呢啲地區交通有改善，即使農地位置喺發展範圍以外，如距離唔遠，料都可受惠。