經歷上周三挾淡友急升568點後，已料港股短期需先行整固，期指玩家有時間整理思緒，想想九月中後旬的策略。

恆指期貨走勢

相信唔少看官感受到，七月開始的港股升浪，極為側重個別重磅藍籌，好似內地三大電訊股及本地地產股，其他股份猶如被基金經理視而不見一樣。

睇實際數據，年初至今恒指累積升幅8.1%，恒指中型股指數升幅不到1%，仲可以話熱錢炒大唔炒細，但睇見由中資金融股，包括四大行及內險股組成的中國H股金融行業指數，仲係原地踏步，可以想像，恒指如果要從兩萬五的基礎上突破，資金分流到其他股份，尤其是在指數比重唔細的中資金融股，甚為重要。倒過來說，筆者不反對期指好友，博冷門把部分注碼轉投內銀內險股，因預期效果相若，但相比回吐的風險可能較細。

另外，恒指雖然只係啱啱升穿25,000點的大型上落區頂部，但今年恒指月均波幅，卻一直維持在千點以上，除「六絕月」罕有595點波幅外，月均波幅1,413點，介乎1,053至1,789點，如果憧憬十月滬港通開車，九月是先低後高市況的話，以上周初低位24,576點為基礎，樂觀估計，月底要見兩萬六點，並非絕無可能。