個市真係死都唔肯回，昨日朝早眼見A股腳軟，恒指即市跌穿10日線24,984點，低見24,946點，以為指數落一格，本文候低（0.618及0.5回吐，24,815點及24,696點）加一注的計劃可以順利完成，殊不知，午後靠中石化（00386）、滙控（00005）以及友邦保險（01299）三隻股票撐住，恒指拗腰倒升54點，收報25,166點。睇港匯仲貼實7.75，看來港股狂牛在熱錢持續流入下，未有停一停抖一抖之意圖。

恆指期貨走勢

八月及九月期指日市分別收25,179點及25,123點，較合理值溢價19點及60點，錄得成交8.95張及4.95萬張，轉倉已進入高峰期，由九月高水幅度來看，結算前暫好友大戶轉倉比較唔錫價。

周四為期指結算日，好友大戶唔畀個市落，在預期之內，但昨日午後單靠幾隻重磅股推高大市，夠晒精彩，上述三隻股份貢獻64點，相當於大市點數升幅118%，反映資金選擇高度集中情況未變。

現時筆者手上僅得三分一注在25,100點開的好倉，會準備先轉落九月合約，至於加注與否，仍要睇大市肯唔肯回，主觀睇嚟周四前似乎機會唔大。