上周初美國聯儲局公布的議息會議紀錄，被投資者視為沒有想像中的「鴿味」，委員之間就加息時間表開始出現爭辯，周五的Jackson Hole央行行長年會上，聯儲局主席耶倫一貫太極高手姿態，平衡市場預期，提出閒置勞動力嚴重的論點，認為現時唔輕易評估離充分就業到底仲有幾遠。

潤燃因調低銷氣量目標令股價急挫，長線投資者可視為低吸機會。（資料圖片）

太陽日誌

美銀美林預測潤燃業績（港元）

毫無疑問，耶倫想拖得就拖，不過將息口由原來同失業率掛鈎，變咗同閒置勞動力有冇改善聯繫，既然連主席都話難估，在下等小投資者就更如丈八金剛摸不着頭腦。最抵死係耶倫仲將雞同雞蛋故事發揚光大，話如果就業市場好到吸引閒置勞動人口重投就業市場，勞動參與率上升又將會限制工資上升，聽到呢度，真係張三豐都要認番佢做師傅。個人認為美國加息仲係有拖無欠，就算加幅度都唔會大，況且歐洲及日本近期經濟數據麻麻，睇嚟距離下次印銀紙已不遠矣。

港股強到無朋友，尋日早市畀A股拖累咗一陣，下晝由滙控（00005）同中石化（00386）帶番個市倒升，收市升54點，報25,166點，整體大市升跌股份比例，係643隻對807隻，跌的股票比升的足足多四分一。

消息股方面，上星期話港視（01137）可能有計，尋日抽升3.7%，收報3.01元，完全補晒三月因買咗流動電視牌之後又唔用得，股價急插，喺2.43至2.96元留低的下跌裂口，睇成交，劇迷可能真有機會睇《警界線》第二集。

華潤系流年不利

業績股繼續成為焦點，華潤系流年不利，華創（00291）連隊三日未止瀉，華潤燃氣（01193）中期業績升17.2%，賺12.51億元。本來數字同大行預測差唔多，但尋日股價一度插低12%，主要受管理層將一五年銷氣量目標由200億立方米大幅降至160億立米方米所致。調低的40億立方米銷售額，大部分來自與天津津燃（01265）的合營項目，管理層直言銷售表現未達如期，上半年也處於虧損。

中央大力鼓勵清潔能源應用，管道燃氣需求持續上升，現時內地天然氣在能源使用上，滲透率偏低，相對其他能源的自然增長亦都較快。以美銀美林更新後的預測，今、明兩年純利27.36億元及32.94億元，每股盈利1.23及1.48元。潤燃一四年PE19.1倍，比新奧（02688）及中燃（00384）的22至23倍，最少有13%折讓，以26%及20%以上的盈利年增長，但就因為調整兩個本來表現麻麻項目的銷氣預測引發急跌，似乎為長線投資者提供低吸機會。