美國聯儲局議息紀錄，繼續為低息期拖得就拖護航，不過，近期帶動大市向上的兩桶油、中移（00941）及港交所（00388），都升到有少少膩。大市終於出現調整，恒指尋日跌165點，收報24,994點，主板成交755億元，八月期指日市收24,995點，較合理值高水10點，成交5.4萬張。

恆指期貨走勢 2014/8/21

上星期提過，近兩星期市況，美中不足係指數破一○年海嘯後大位24,988點，卻一直無法進一步拋離這多年阻力。不妨睇番七月期指結算日，恒指收報24,732點，至今指數僅有262點進帳，即使以周初高位25,201點比較，也只是累升469點。

整體大市畀人感覺是市底頗強，但指數升幅卻不算多，是資金只在個別重磅股之間輪流炒作，卻一直未見一個更全面的升市，使今浪無論炒個股或者賭指數的玩家，要贏錢都唔係咁容易。

筆者恃住早於24,000點樓下已買住好倉上嚟，手上有盈餘不怕坐貨損失機會成本，即使現貨指數結算前回一回到24,988點樓下，完成後抽，心理壓力亦都唔大，由港匯昨再觸及7.75水平，睇唔到資金有撤出迹象。

基於暫時僅動用三分一本錢入市，如回吐，例如見24,190至25,201點的0.618甚至0.5回吐，即24,815點及24,696點，會多落一注。