魚缸Blogger：中航工業跟炒一轉

近期中航系表現唔錯，其中六月推介過嘅中航工業（00232）最搶眼，至今累積升幅25%，上周五狂飆10.4%，以近全日高位0.37元收市，14日RSI處合理水平，睇勢話唔定可踢上五十二周高位0.4元，想跟炒一轉嘅話仲未怕遲。

中航工業去年上半年蝕2,694萬元，下半年錄得出售若干上市投資收益，全年轉賺3.9億元，按年增長10.5%。四月時公司宣布或有新業務，就係在浙江省及周邊地區開拓貿易業務，涉及供應原材料及輔助材料，如電子元器件、電子產品及金屬材料等，是次優化業務組合料可改善盈利能力，事關去年針織及紡織業務分部見紅（錄得虧損115萬元），而航空技術相關業務又仲未有收入貢獻。

雖然佢有權分佔中航國際來自營運EC120（直升機）項目的淨收入80%，但因一二及一三年中航國際於此項目並無錄得盈虧，所以中航工業主要依賴單一分部同投資，盈利能力容易波動係一大風險。