恒指上周初步考驗了24,200點水平支持，繼續以調整市看待，後市展望仍以偏好居多。畢竟近月不少資金流入香港，樓市雖然迭創新高，但受辣招限制，炒家難有作為。呢期魚缸主題不離國企改革以及滬港通，建議多在呢兩方面下功夫，發掘明日之升！

上月國美發盈喜，預期上半年純利大增逾倍。(資料圖片)

上周五一隻異動股，乃好生面口的滬光國際（00770），旗下基金管理公司獲上海市政府洽購，股價急升88%。講到上海，作為內地金融中心的地位毋容置疑，但至今尚未見有上海市政府背景的大型綜合金融服務企業赴海外上市。

究根歸柢，上海市窗口公司限於在海外註冊的紅籌身份，市控金融國資控股權不對外，難以涉足相關投資領域，故做來做去都不離基建房產。如今國企改革，鼓勵行混合所有制，上海市話要用五年時間基本完成國企改革，對投資相關股份有何啟示，值得探討。

港樓價高到得人驚

政府同物業代理的數據不約而同顯示樓價上升的現實，相信唔少一路話樓價會下跌的專家都不是味兒，但唔緊要，反正繼續堅持睇淡，樓價總有一日會跌，道理同話人終有一日會拜拜相類似。阿莊唔係樓市專家，但就認為香港經濟唔差，就業情況穩定，樓價上升並非與經濟表現背道而馳。

再講，依家金管局要求銀行為按揭業主進行3厘壓力測試，買得樓的都係有番咁上下實力的用家。九七年年底香港銀行體系內總貸款和墊款約為所有存款的1.5倍，而截至今年六月底的總貸款和墊款只佔73%，係咪專家們講得咁「危」，樓價要跌三五七成，看官自行決定。反正買樓買股也好，時刻密切監察市場情況，掌握數據分析，做好風險管理，量力而為，咁就立於不敗之地。

上周五傳來內地醞釀針對電貿等新興產業推重大利好政策，騰訊（00700）反彈1%，金山軟件（03888）升3%，博雅（00434）升4%。針對電商，其實家電股國美電器（00493）都值得關注。

國美中績表現唔錯，管理層目標係電商業務今年佔收入比例一成、明年收支平衡。上月有基金按每股均價1.31元在場外大手減持，惟未有太大沽壓，相信接得咁大批貨的亦非等閑。短線股價守穩50日線1.28元樓上，而板塊氣氛又成氣候的話，可以小注一試，向上較大阻力在1.5元水平，支持位250日線1.23元。