常說「升市莫估頂」，呢啲係用經驗累積得出的結論，自有一番道理。唔少缸邊友在恒指升至24,500點試沽，結果撞板，尋日恒指一度挾到上24,912點，尾市港股在高位波幅擴大，大戶對撼，成交突破千億元，最終恒指收報24,732點，升91點，暫時好友仍處上風。

下半年政策轉向，仍未完全反映在內房股估值上。（資料圖片）

幾個現象令阿莊不敢過早估頂，首先，資金持續流入香港，金管局頻頻出手注資，水浸魚缸如何睇跌？其次係，見到弱勢藍籌紛紛破位，典型例子係中移（00941），相信係基金增持港股，只要係重磅股，就照掃可也。第三，見到今浪較早起步的地產股，近兩日再現升勢，雖然尋日尾市現回吐，但整體仍維持偏強，再次證明有資金力吸重磅股。

華能逢反彈減磅

建軍節前，中央終於宣布立案打大老虎，阿莊在想，中央選擇在內地經濟回穩，A股重現升勢之時宣布此起大案，顯然係深思熟慮，一切盡在掌握中，以防生亂。短期案件相關利益鏈將陸續曝光，打貪力度乃建國以來最大。還望經此一役，重建國內外對政府廉潔治國的信心，這一關實不易過，但成功清洗太平地後，內地經濟可望重現繁華景象。

未知是否憧憬有關行業肅貪調查告一段落，與石油相關的油服股尋日異軍突起，但市場上有更多更好的選擇，故不建議追入。

此外，尋日華能國際（00902）逆市下跌，原因係中績未見突出，更貼切啲講係好消息出貨。事實上，電力股屬公用股類別，在大升市絕非資金首選吸納對象，加上以華能為例，由首季低位反彈至今累升幅度已超過五成，業績因素經已反映，相信短線獲利沽壓未完，持貨者宜逢反彈減持。

內房股限購政策放鬆，與早前本港放寬換樓DSD有點類似，結果係會刺激交投，協助加快消化市場存貨，緩解房企資金流動性緊張的問題。下半年的政策轉向，尚未完全反映在內房股估值上，如今押注仍未算遲。

越秀地產（00123）上半年累計合同銷售金額約106.3億人仔，同比增長23%，佔全年銷售目標的48%。隨着下半年銷售進度提速，有望實現全年銷售目標。該股尋日收報1.68元，市帳率僅0.5倍，息率5厘。待一線內房升定，類似越地呢類估值相對低的內房股有望接力追上，1.6元水平分注收集，季內目標試叩2元關，守穩1.5元可繼續持有。