未來九龍東商廈供應大增，加上近年企業擴充意欲唔高，拖累租金表現。睇番代理嘅數據，過去一年，觀塘同埋九龍灣唔少甲級寫字樓租金都罕有咁下跌。當中觀塘萬兆豐中心期內跌幅最勁，超過24%，聽講幢物業有個低層單位，早排以每月約2.8萬元租咗，呎租僅約14元，租金「低水」約15%外，亦重返該廈約兩年前呎租水平。有代理預計，今年下半年東九龍租金會再跌5至8%。

萬兆豐中心

近期九龍東部分寫字樓低呎租個案

受惠起動九龍東，舊年年初觀塘同埋九龍灣，有唔少甲級商廈呎租達約30多元，媲美尖東唔少商廈呎租。

不過，隨着整體租賃市況轉差，有成交租金出現倒退。劉Sir睇到美聯商業同市場嘅數據，發現萬兆豐中心今年各月平均呎租均跌穿20元。如一個低層面積約2,000方呎單位，業主早排以每月約2.8萬元租出，呎租只約14元，比起該廈呎租低約15%。

觀塘寧晉劈11%求客

事實上，近幾個月由發展商持有嘅觀塘甲級商廈，呎租都罕有咁跌至約23至24元水平，相對舊年呎租約33元水平，風光不再。

劉Sir睇番數據，觀塘寧晉中心上月平均呎租只約23元，係今年低位；有個中層戶業主擴大租金減幅吸客，單位租約幾個月前先屆滿，業主原先以每方呎約26元放租，但係最近決定將意向呎租降至約23元，月租金約4.6萬元，減幅11.5%，比起前租金只係升4%。

另一方面，九龍灣其士商業中心今年四月平均呎租約20.5元，返番去舊年十月份水平，而到五月份略為回升到21元水平，本月暫錄一個低層單位以呎租約18元成交。

下半年預料再跌8%

聽講區內企業廣場1期3座中層戶，單位面積約2,500方呎，以月租金約4.25萬元租出，呎租約17元，較該廈平均呎租亦低約10%。

美聯商業助理區域營業董事許少娟話，未來兩年觀塘同九龍灣將最少有4個新建寫字樓落成，提供過百萬方呎樓面，供應量十分充裕，租金點會冇壓力？加埋區內將有多幢工廈活化轉寫字樓招租，難免拖累寫字樓租金，上半年九龍東商廈租金已跌10%，下半年相信會再跌5至8%。