魚缸Blogger：綠葉製藥跟炒一轉

隻半新股綠葉製藥（02186）尋日首次突破7蚊關，即市高見7.08元，創上市新高，現價較招股價5.92元升18%，由於無蟹貨隱憂，後市上升空間仍大。

綠葉業務包括腫瘤、心血管系統、消化及代謝三類創新藥，而中樞神經系統將會係佢嘅下一個目標，為咗補充藥物開發計劃，將會物色以產品為目標的收購及授權機會。截至去年底止，公司共有22種在研產品，預計二○年前推出，其中17種料於一八年前，另亦啱啱公布用於治療糖尿病的「酒石酸艾格列汀片」，已經攞到臨床試驗批件，有望豐富現有產品線。

望吓業績，一一至一三年分別錄得收入17.7億元（人民幣．下同）、21.3億元及25.1億元，純利1.5億元、1.6億元及3.1億元，毛利率高達83.6%。查實佢曾於○四年在新加坡上市，一二年私有化，皆因流動性低，直到今年轉戰香港，成交流通量算活躍，好似尋日都有逾兩億銀，不妨吼位跟炒一轉。