經過連續多日的高位橫行兼成交愈玩愈縮，港股尋日終於打破悶局，恒指一升就394點，收報23,782點，創咗今年新高。七月期指7萬張高成交，是本月轉倉後最高，主板成交717億元，亦係滬港通消息曝光後第二高紀錄，令到尋日大市技術突破的可信性高咗唔少，相信挑戰24,111點之日不遠矣。

大行預測跌了大半年的水泥價格，有望在八、九月見底回升。（資料圖片）

太陽日誌

綜合大行預測海螺業績（人民幣）

全球最大豬肉食品企業萬洲國際四月尾上市撻Q，外電報道即將捲土重來，初定每股6.2元，同四月時招股價8至11.25元比較，減價幅度介乎22.5至44.8%；預計發行25.6億股，同四月時的36.55億相比，少三成；集資額156.7億元，比上次預計的292至411億元，唔見咗46至62%。

肯跪低減價出貨，同舊年收購美國史密斯菲爾德，令負債激增至74億美元肯定有關，唔少人估計高盛及美國CDH等舊股東傾向挾佢上轎，等佢地嘅投資可以退場。

萬洲減價重來

傳聞中招股市盈率11.5倍，遠比第一次招股時的15至20.8倍低，同史密斯菲爾德畀萬洲收購前約10倍的估值差唔多，估計會較容易被大孖沙接受。上次動用29間保薦人都搞唔掂，今次要監平監賤頂硬上，本來筆者唔多睇好，不過近期港股破頂兼氣氛唔錯，應該會幫到萬洲。

市傳溫州取消限購令，內房股表現標青，世房（00813）升4.7%、中海（00688）升4.3%、遠洋地產（03377）升3.6%、潤地（01109）升3.1%。如果傳言屬實，溫州會係內地第一個大城市撤出樓市調控措施，不過值唔值得咁高興？見仁見智。近日多個城市的地方政府，眼見四、五月內地樓市成交萎縮，憂慮斷了地方賣地收入的米路，都各自擱置限購令的執行，中央亦隻眼開隻眼閉，已經被視為調控措施轉向先兆。

內房首選中海

唔講可能唔知，溫州算係全國樓市最早爆煲的城市，亦係70大城市中，唯一一個自一一年八月至今，住宅銷售價格按月跌足34個月的城市，就算阿爺出手救佢都係意料中事。筆者維持建議，仲係以頭六個月銷售數字已經過全年目標一半，嚟緊七、八月無劈價賣樓壓力的中海作為首選。

睇見內房股炒限購令鬆綁炒得咁高興，筆者亦打算睇番早排輪住出盈喜的水泥股。第二季內地樓市滯銷，發展商放慢建屋量，加上七月又係傳統淡季，令水泥價拾級向下。不過，龍頭安徽海螺（00914）股價由四月初的35.7元，跌到落五月的25.8元，累積跌兩成七之後，近排似乎搵到支持，尋日升3.1%，收報29.2元。

海螺發盈喜預告上半年盈利大升九成，證實儘管第二季水泥價級級落，但銷售額的增長及煤價等原材料成本持續低企下，海螺仲係立於不敗之地，以去年中期賺30.5億元（人民幣．下同）計，今年上半年盈利至少有58億元，相當於綜合大行預測121億元的四成八。大行估跌了大半年的水泥價，有機會在八、九月見底回升，看來全年達標機會唔細，10.3倍PE，同過去五年平均15.1倍比較，只得三分之二，30港元樓下睇嚟都博得過。