內地放水解新股錢荒，港股亦乘勢打破悶局，傳溫州口頭放鬆限購，內房股及內銀股做好，恒指尋日由頭升到尾，收報23,782點，升394點，大市總成交增加至723億元。

阿里在美上市前，騰訊作為頭號影子股，估值有望水漲船高。（資料圖片）

阿莊近日多次提到，港股市底偏強，如今由資金推動的升市來得實在，淡友即使唔信後市會爆升，最好亦別太心急加沽，以免被人挾爆倉，事關一旦恒指大成交抽穿24,000點，好可能會為下半年的單邊大升市揭開序幕！

升市頗為全面，重磅股明顯見到有資金流入掃貨，濠賭股、三桶油亦能分一杯羹。阿莊持有的港交所（00388）破頂，高見157.4元，收報157元，升3.3元，好在來得及按計劃以均價153.7元增持了1,000股。此外，亦以均價49.35元增持5,000股比亞迪（01211），最高見過50.1元，收報49.95元，升3.7%。

不宜迷戀炒股仔

大價股動身，細價股活躍度略降，雖然升幅榜仍不乏股仔名字，但前日的急升股，唔少尋日去咗跌幅榜，如英發國際（00439）、聖馬丁（00482）、Magnum（02080），科浪（02336）。老實講，若然後市真係確認向上的大方向，資金應轉移至主攻指數成分股，別再沉迷於短炒股仔。

本來市場一直的說法係阿里擬於八月八日在美上市，但近日卻又傳出另一版本，指阿里已將在美上市日期延遲至九月，原因有傳係須時解答關於上市的疑問，如股東背景、股權結構等等，另一說法係話八月八日原來唔係咩大吉日，加上八月好多美國基金經理例牌放假去也，所以索性延至九月登場。

正由於阿里赴美上市延遲，早幾日相關概念股異動，但之後又無以為繼。不過，見到尋日騰訊（00700）股價表現像樣，高位曾見124.3元，收報124.1元，升2.1%。股價以大成交重上10日線，若今日保持升勢，可確認整固完成，挑戰五十二周高位129.2元應無難度。

事實上，雖然騰訊並非在美上市，但阿里以高估值上市，前者唔多唔少都可以受惠，身價水漲船高。從另一角度睇，騰訊可以話係港股中的阿里頭號影子股，率先炒起騰訊，亦有利阿里九月在美上市的氣氛。換句話講，阿里上市前押注喺騰訊身上，橫睇掂睇贏面唔細！阿莊將騰訊年內目標價定在140元，重要支持在50日線115元水平。