魚缸Blogger：天大油管醞釀破頂

上月底推介過嘅油管股勝利管道（01080），股價都算硬淨，至今依然喺5毫子關徘徊，留意到另一隻天大石油管材（00839）唔經唔覺又想破頂，尋日升近半成，收報1.72元，同一年高位1.83元距離唔遠，加埋14日RSI（64）有上升動力，短炒目標睇2蚊關。

受累市場競爭激烈、原材料鋼坯價格下跌等因素，天大油管產品平均售價由前年的每噸4,990元（人民幣．下同），降至去年的每噸4,475元，減幅10%。類似情況亦延至今年初，首季產品每噸平均售價4,321元，同比下跌4.5%，產量及銷量則分別下跌15.1%及33.3%，而公司就解釋利用春節前後一個月對油井管生產線停產實施維護及技術升級所致。

另外，公司亦主動調整產品結構及客戶群、大力推廣高附加值產品，以削減部分低毛利產品銷量。即使在專用管行業產能過剩、美國雙反下，唔排除公司可以好似去年咁，透過優化策略幫佢突圍而出！