滙豐股市策略師Garry Evans，以因為可能發生的佔中（之後新版本加入其他經濟素淡化政治味道）為由，建議投資者減持香港股票，本以為可以令港股打破悶局，點知尋日恒指波幅都係僅僅夠一百點，指數幾近原地踏步，收23,541點，主板成交512億，沽空佔成交比例跌至8.9%的六個交易日新低，可見連淡友都唔知點做。

近期和電及數碼通股價轉強，反映市場對其業務前景看法樂觀。（資料圖片）

太陽日誌

電訊股一四年度業績預測（港元）

儘管滙豐報告把港股由「中性」降至「減持」級別，但以年終指數25,000點目標，較尋日收市指數仲有6.1%上升空間，對比年初至今港股得果1%的升幅，回報已經唔算差，只不過喺策略師眼中，有其他更高潛在回報的市場而已。睇番尋日港匯升到7.7501水平，若非賭港匯脫鈎，相信游資充裕之下，短期港股改寫今年高位機會仲係比較大。

港股後市睇數據

恒指上周三抽升358點後，大市何時先再嚟突破，股民務必要睇實今、明兩日的中國經濟數據。今日公布的六月CPI，估計會由2.5%回落至2.4%，最終數字愈低愈好，因意味人行有較大的財政空間去刺激經濟，包括全面降低存款準備金率。至於後日出籠的六月進出口數字，大行估出口增長會進一步改善，由五月的7%增長擴闊至10.4%。當然，如果最終高於此數，航運及出口股或者可以趁機出現突襲。

本地兩大流動電訊供應商PCCW-HKT及CSL正式合併，理論上有助節省營運成本，電訊商有空間降低服務收費，但理想同現實始終係兩碼子的事，尋日網上見到合併後的收費表，銀碼普遍上調，尤其帶機上台的高數據用量月費計劃，加幅接近三成。

和電息率較吸引

如果到過美加、歐洲旅行都應該都體驗到，香港流動電訊服務相對其他先進城市，是十二分之便宜。筆者早前去移民勝地溫哥華探朋友，諗住買張預付卡（Pre-paid）用幾日，至發現除咗每分鐘按時收費之外，連張sim卡都要用家自己買，先畀20元加紙（約144港元）再充值入去先用得，同香港行入七仔，花幾十蚊有交易，相差極遠。

香港流動通訊收費咁平，關鍵係港府過往大刀闊斧開放電訊業市場，最勁係九六年一口氣發六個PCS牌照，九九年全球最先推出流動電話號碼可攜服務，大大提高本地電訊商競爭。但時移世易，經過多年收購合併，香港持牌流動通訊商剩低四間，市場競爭減少，在可預見的將來，本地流動通訊收費恐怕有升無跌。

過去兩年，兩隻上市電訊商數碼通（00315）及和電香港（00215），因為智能手機月費用戶ARPU升幅放緩，同時數據用量增加令網絡成本增長比收入更快，拖累業績短期見頂，不過近期兩股股價開始逐漸重拾活力，正道出投資者對於未來電訊服務收費及電訊商之間競爭減低的樂觀睇法。現價和電的預期息率有4.48厘，兩股之中，似乎以佢較為吸引。